പാലായിൽ ചെക്ക്ഡാം തുറക്കാനുള്ള ശ്രമത്തിനിടെ ഒരു മരണം ; അപകടം പലകകൾക്കിടയിൽ കയർ കുരുക്കുന്നതിനിടയിൽ

കോട്ടയം :  പാലായിൽ ചെക്ക്ഡാം തുറന്നുവിടാനുള്ള ശ്രമത്തിനിടെ ഒരു മരണം. കരൂർ സ്വദേശി ഉറുമ്പിൽ രാജു (53) ആണ് മരിച്ചത്. പാലാ പയപ്പാർ അമ്പലത്തിന് സമീപം കവറുമുണ്ടയിൽ ചെക്ക്ഡാം തുറന്നുവിടാനുള്ള ശ്രമത്തിനിടെ കൈ പലകകൾക്കിടയിൽ കുരുങ്ങി മുങ്ങിമരിക്കുകയായിരുന്നു.

ഉച്ചയ്ക്ക് ഒരു മണിയോടെയാണ് അപകടം. കരൂർ പഞ്ചായത്തിലെ 7-ാം വാർഡ് കവറുമുണ്ടയിലാണ് സംഭവം. ചെക്ക്ഡാമിന് മറുകരയിൽ 3 കുടുംബങ്ങളാണ് താമസിക്കുന്നത്. ഇവർക്ക് പ്രധാന ജംഗ്ഷനിലേയ്ക്കെത്താൻ ചെക്ക്ഡാമിന് മുകളിലൂടെയാണ് വഴി. അല്ലെങ്കിൽ 2 കിലോമീറ്റർ ഓളം ചുറ്റി സഞ്ചരിക്കണം.

ഇത്തവണ മഴ ശക്തിപ്രാപിക്കും മുൻപേ വെള്ളം തടഞ്ഞുനിർത്തുന്ന പലകകൾ മാറ്റണമെന്ന് കുടുംബങ്ങൾ പഞ്ചായത്തിനോട് ആവശ്യപ്പെട്ടിരുന്നെങ്കിലും നടപടിയുണ്ടായില്ല. തുടർന്ന് പഞ്ചായത്ത് അനുമതിയോടെ ഇന്ന് ഇവർതന്നെ പലകകൾ മാറ്റാനുള്ള ശ്രമത്തിനിടെയായിരുന്നു അപകടം.

മറുകരയിലെ താമസക്കാരും സുഹൃത്തുക്കളും ചേർന്നാണ് രാജുവിനൊപ്പം പലകകൾ മാറ്റിയത്. ചെക്ക്ഡാമിന് 4 ഷട്ടറുകളാണുള്ളത്. 3 ഷട്ടറുകൾ മാറ്റിയശേഷം അവസാനത്തെ ഷട്ടറിന്റെ പലകകൾ മാറ്റാനുള്ള ശ്രമത്തിനിടെ രാജുവിന്റെ കൈ പലകകൾക്കിടയിൽ കുരുങ്ങി അപകടം സംഭവിക്കുകയായിരുന്നു.

ഒരാൾ താഴ്ചയിലധികം വെള്ളമുള്ളപ്പോഴാണ് പലകകൾ മാറ്റാനുള്ള ശ്രമം നടത്തിയത്. എന്നാൽ ഏതാനും ദിവസം മുൻപ് അധികൃതർ നടപടി സ്വീകരിച്ചിരുന്നുവെങ്കിൽ ഈ അപകടം ഒഴിവാക്കാനാകുമായിരുന്നു എന്ന് പ്രദേശ വാസികൾ പറഞ്ഞു.