ചത്താലും കുഴപ്പമില്ല ഓഫർ കിട്ടിയാൽ മതി : കൊറോണ വന്നാൽ അര ലക്ഷം രൂപ തിരികെ ..! നന്തിലത്ത് ജി-മാർട്ടിൻ്റെ കോട്ടയം നാഗമ്പടത്തെയും പാലായിലേയും ഷോറൂമുകളിൽ വൻ ആൾക്കൂട്ടം: കോവിഡ് നിയന്ത്രണം ലംഘിച്ചതിന് നന്തിലത്തിനെതിരെ കേസെടുക്കും

സ്വന്തം ലേഖകൻ

കോട്ടയം: നന്തിലത്ത് ജി മാർട്ടിൽ പർച്ചേസ് നടത്തുന്നതിനിടെ കൊവിഡ് ബാധിച്ചാൽ അരലക്ഷം രൂപ വരെ തിരികെ ലഭിക്കുമെന്ന ഓഫർ കേട്ട് നാട്ടുകാർ കൂട്ടത്തോടെ ഷോറൂമിൽ പാഞ്ഞെത്തി. നാഗമ്പടത്തെയും പാലായിലേയും നന്തിലത്ത് ജി- മാർട്ട് ഷോറൂമുകളിലാണ് നൂറ് കണക്കിന് ആളുകൾ ഒന്നിച്ച് എത്തിയത്.

കൊവിഡ് മാനദണ്ഡം ലംഘിച്ച് ആളുകൾ എത്തിയതോടെ രണ്ടിടത്തെയും ഷോറൂമുകൾ പൊലീസ് എത്തി അടപ്പിച്ചു. കൊവിഡ് നിയന്ത്രണം ലംഘിച്ച സ്ഥാപനത്തിനെതിരെ പൊലീസ് കേസെടുക്കും

സ്വാതന്ത്ര്യ ദിനത്തിൻ്റെ ഭാഗമായാണ് നന്തിലത്ത് ജി മാർട്ട് ഷോറൂമുകളിൽ ഓഫർ പ്രഖ്യാപിച്ചത്. പ്രമുഖ ചാനലുകളിൽ നൽകിയ പരസ്യത്തിൽ , സ്ഥാപനം സന്ദർശിച്ച് 48 മണിക്കൂറിനുള്ളിൽ കൊറോണ ബാധിച്ചാൽ അര ലക്ഷം രൂപ വരെ ബിൽ തുകയിൽ നിന്നും കുറവ് വരുത്തുകയോ തിരികെ നൽകുകയോ ചെയ്യുമെന്ന ഓഫറാണ് കമ്പനി മുന്നോട്ട് വച്ചിരുന്നത്.

കോവിഡിനേയും വിറ്റ് കാശാക്കുന്ന  നന്തിലത്തിനെതിരെ വൻ പ്രതിഷേധമാണ് ഉയരുന്നത്