പൗരത്വ ഭേദഗതി നിയമത്തെ അനുകൂലിച്ച് നടൻ രജനികാന്ത്: സമരങ്ങൾ രാഷ്ട്രീയ പ്രേരിതം; ഇന്ത്യൻ മുസ്ലീങ്ങൾക്ക് ഒരു പ്രശ്നവുമുണ്ടാകില്ല; വിദ്യാർഥികൾ രാഷ്ട്രീയ പാർട്ടികളുടെ ഉപകരണമാകരുത്

സ്വന്തം ലേഖകൻ

ചെന്നൈ: പൗരത്വ ഭേദഗതി നിയമത്തിനെ അനുകൂലിച്ച് നടൻ രജനികാന്ത്. സമരങ്ങൾ രാഷ്ട്രീയ പ്രേരിതമെന്നും നിയമം കൊണ്ട് ഇന്ത്യൻ മുസ്ലീങ്ങൾക്ക് ഒരു പ്രശ്നവുമുണ്ടാകില്ല. രാജ്യത്ത് ദേശീയ പൗരത്വ രജിസ്റ്റർ ( എൻ.പി.ആർ) അത്യാവശ്യമാണെന്നും വിദ്യാർഥികൾ രാഷ്ട്രീയ പാർട്ടികളുടെ ഉപകരണമാകരുതെന്നും രജനികാന്ത്.

വിദ്യാർഥികൾ സമരത്തിനിറങ്ങുന്നതിന് മുമ്പ് നിയമം കൃത്യമായി പഠിക്കണം. അധ്യാപകരോടും രക്ഷിതാക്കളോടും അതേപ്പറ്റി സംസാരിക്കണം. ഇന്ത്യൻ മുസ്ലീങ്ങൾക്ക് എതിരല്ല ഈ നിയമം. അങ്ങനെ ആയിരുന്നെങ്കിൽ ആദ്യം സമരത്തിനിറങ്ങുക താനാകുമായിരുന്നുവെന്നും രജനികാന്ത് വ്യക്തമാക്കി. എൻപിആറിനെതിരെ എന്തിനാണ് സമരം നടത്തുന്നതെന്ന് അറിയില്ല. നേരത്തെ കോൺഗ്രസ് നടപ്പിലാക്കിയതാണ് എൻപിആറെന്നും അദ്ദേഹം പറഞ്ഞു.

നേരത്തെ കേന്ദ്രസർക്കാരിന് അനുകൂലമായ പല പരാമർശങ്ങളും രജനികാന്തിന്റെ ഭാഗത്തുനിന്നുണ്ടായിട്ടുണ്ട്. ദ്രാവിഡ രാഷ്ട്രീയത്തിന്റെ ആണിക്കല്ലായ പെരിയാറിനെതിരെ പരാമർശം നടത്തിയത് വലിയ വിവാദമായിരുന്നു. ഇതിന്റെ പ്രതിഷേധങ്ങൾ തുടരവെയാണ് പൗരത്വ ഭേദഗതി നിയമത്തിൽ കേന്ദ്രത്തിന് അനുകൂലമായ പരാമർശവുമായി രജനികാന്ത് വീണ്ടും രംഗത്തെത്തിയത്.