മുംബൈയിൽ നമ്മളെ രക്ഷിക്കുന്നത് ശിവസേന; മുസ്ലീമിനെക്കാൾ ഭേദം ഹിന്ദു; ക്രിസ്ത്യാനികളെ ലോകത്ത് മുഴുവൻ കൊന്നൊടുക്കുന്നത് മുസ്ലീങ്ങൾ; അഞ്ഞൂറു വർഷം മുൻപ് ടിപ്പു സുൽത്താൻ കൊന്നുതള്ളിയത് ക്രിസ്ത്യാനികളെയും ഹിന്ദുക്കളെയും; വിവാദമായി കാപ്പിപ്പൊടി അച്ചന്റെ അധികപ്രസംഗം; സൈബർ ലോകം ഇളകിയതോടെ മാപ്പ് പറഞ്ഞ് അച്ചൻ

സ്വന്തം ലേഖകൻ

കോട്ടയം: ടിപ്പു സുൽത്താനെയും, മുസ്ലീം സമുദായത്തെയും ഒന്നടങ്കം സംശയനിഴലിൽ നിർത്തിയ വിവാദ പ്രസംഗവുമായി കാപ്പിപ്പൊടി അച്ചൻ. കാപ്പിപ്പൊടി അച്ചനെന്ന പേരിൽ പ്രശസ്തനായ ഫാ.ജോസഫ് പുത്തൻപുരയാണ് വിവാദമായ പ്രസംഗവുമായി രംഗത്ത് എത്തിയിരിക്കുന്നത്. പ്രസംഗം വിവാദമാകുകയും സോഷ്യൽ മീഡിയ ഏറ്റെടുത്ത് സജീവമായി ചർച്ചയാകുകയും ചെയ്തതോടെ കാപ്പിപ്പൊടി അച്ചൻ ഒടുവിൽ മാപ്പുമായി രംഗത്ത് എത്തി. മാപ്പ് പറഞ്ഞെങ്കിലും അച്ചന്റെ വിവാദ പ്രസംഗത്തിനെതിരെ സമൂഹ മാധ്യമങ്ങളിൽ പ്രതിഷേധം കനക്കുകയാണ്.

അച്ചന്റെ രണ്ടു മിനിറ്റും 33 സെക്കൻഡും ദൈർഖ്യമുള്ള പ്രസംഗത്തിലാണ് കൊടിയ വിഷമുള്ള പ്രയോഗങ്ങൾ ഉള്ളത്. വകയാർ സെന്റ് മേരീസ് ഓർത്തഡോക്‌സ് പള്ളിയിൽ നടന്ന പ്രസംഗമാണ് ഇപ്പോൾ വൈറലായും വിവാദമായും മാറിയത്.

ആ പ്രസംഗത്തിന്റെ പ്രശസ്തഭാഗം ഇങ്ങനെ

വാടിക രാജാവിന്റെ സൈന്യാധിപനായ ടിപ്പു സുൽത്താൻ മലബാറിൽ വന്നു. ടിപ്പുവും പട്ടാളവും ക്രിസ്ത്യാനികളെ വെടിവച്ചു കൊന്നു, ഹിന്ദുക്കളെ ഇല്ലാതാക്കി. പേടിപ്പിച്ച് വിരട്ടി ഹിന്ദുക്കളെയും ക്രിസ്ത്യാനികളെയും പേടിപ്പിച്ച് മതംമാറ്റിയതാ, 515 വർഷങ്ങൾക്കപ്പുറത്ത്.
പൗരത്വബില്ലിൽ കേന്ദ്ര സർക്കാർ കാണിച്ചത് തെറ്റാണ്. പക്ഷേ, മുസ്ലീംങ്ങളും നമുക്ക് വിശ്വസിക്കാൻ പറ്റുന്നവരല്ല. ബോംബെയിൽ നമ്മൾ കണ്ടു. ശിവസേന ഉള്ളത് കൊണ്ടാണ് ബോംബെയിൽ നിൽക്കാൻപറ്റുന്നത്. ലോകത്തിൽ ഒരു രാജ്യത്തു മാത്രമേയുള്ളൂ മുസ്ലീംങ്ങൾക്കു മാത്രം സഞ്ചരിക്കാൻ സാധിക്കുന്ന റോഡ്. സൗദിയിൽ മെക്കയിൽ, അവിടെ നമ്മൾ വണ്ടിയോടിച്ചാൽ ശിക്ഷയാ.
ലോകത്ത് ഏറ്റവും കൂടുതൽ ക്രിസ്ത്യാനികളെ കൊല്ലുന്നത് ആരാ. ഏഷ്യയിൽ, ഇറാക്കിൽ, സിറിയയിൽ. ഒരു പക്ഷം പിടിച്ച് വികാരം പറയുമ്പോൾ മറുഭാഗത്ത് ഉണ്ട്. മതഭ്രാന്തൻമാർ വന്ന ശേഷമാണ് ഈ ബഹളം.
ടിപ്പുവിന്റെ പട്ടാളം ആലുവ കഴിഞ്ഞ് പോന്നു. ആലങ്ങാട് വന്നപ്പോൾ മാവ് വളഞ്ഞു. ഇതോടെ ടിപ്പുവിന്റെ പട്ടാളത്തിന് മുന്നോട്ട് പോകാൻ പറ്റിയില്ല. ആ സ്ഥലമാണ് കൂനമ്മാവ്. അങ്ങിനെ ടിപ്പുവിന്റെ പട്ടാളം വരുമ്പോൾ , ചേറായി ബീച്ചിൽ ശക്തമായ മഞ്ഞ്. ആ മഞ്ഞിൽ ടിപ്പുവിന്റെ പട്ടാളത്തിന് പള്ളി കാണാൻ പറ്റിയില്ല. അങ്ങിനെ ടിപ്പുവും പട്ടാളവും വാഡിയിൽ മറ്റൊരു യുദ്ധമുണ്ടായി. അതു കൊണ്ടു അവർ തിരിച്ചു പോയി.
ഇല്ലെങ്കിൽ അഞ്ഞൂറ് വർഷം മുൻപ് ആ പട്ടാളം വന്നേനെ. കോട്ടയം, അടൂർ, പത്തനംതിട്ട, ദേവലോകം, വകയാറ്, റാന്നി ഒറ്റ പോക്ക് പോയേനെ.. അങ്ങിനെയാണെങ്കിൽ ഇന്ന് നിങ്ങളുടെ ഒക്കെ പേര്.. ഫാത്തിമ, സുലൈഖ, ബഷീർ മുസ്തഫ ഇങ്ങനെ ആയേനെ..

പരാമർശങ്ങളിൽ ഖേദം ്പ്രകടിപ്പിച്ച് ഫാ.പുത്തൻപുരയ്ക്കൽ രംഗത്തെത്തിയിട്ടുണ്ട്. ഫെയ്‌സ്ബുക്കിൽ ഇട്ട വീഡിയോയിലാണ് പുത്തൻപുരയ്ക്കൽ വിവാദത്തിൽ വിശദീകരണവുമായി രംഗത്ത് എത്തിയത്. ലൗജിഹാദിന്റെയും ,നൈജീരിയ കൂട്ടക്കൊലയുടെയും പശ്ചാത്തലത്തിലാണ് തനിക്ക് ലഭിച്ച ചോദ്യങ്ങൾക്കു മറുപടിയായാണ് താൻ ഇതു സംസാരിച്ചത്. ക്രൈസ്തവ ദർശനത്തിൽ കുട്ടികളെ വളർത്തണം എന്നതായിരുന്നു ലക്ഷ്യമിട്ടിരുന്നത്. ടിപ്പു സുൽത്താന്റെ പടയോട്ടത്തിന്റെ ഭാഗമായി പറഞ്ഞത് ഒരു തമാശ രീതിയിൽ പറഞ്ഞത്. ആർക്കോ മുസ്ലീം സമുദായത്തോട് എതിർപ്പുള്ളവർ ആരോ ഈ ഭാഗം മാത്രം പുറത്ത് എടുത്ത് വിട്ടതാണ്. ആരെയെങ്കിലും വേദനിപ്പിച്ചെങ്കിൽ ക്ഷമചോദിക്കുന്നതായും അദ്ദേഹം പറഞ്ഞു.