1000 രൂപ വീതം സമ്മാനമടിച്ച നാല് ടിക്കറ്റുകള്‍ കൈവശമുണ്ടെന്നും പണം വേണമെന്നും ആവശ്യം; വില്‍പനക്കാരനെ കബളിപ്പിച്ച്‌ ലോട്ടറി ടിക്കറ്റുകളും 1000 രൂപയും തട്ടിയെടുത്തു
സ്വന്തം ലേഖിക
കറുകച്ചാല്‍: നിരത്തില്‍ നടന്നു ലോട്ടറിക്കച്ചവടം നടത്തുന്നയാളെ കബളിപ്പിച്ച്‌ 25 ലോട്ടറി ടിക്കറ്റുകളും 1000 രൂപയും തട്ടിയെടുത്തു.
മാന്തുരുത്തി മാപ്പിളക്കുന്നേല്‍ എം.സി. ജോസഫി (70)ന്‍റെ പണവും ലോട്ടറി ടിക്കറ്റുകളുമാണ് നഷ്ടമായത്. ബുധനാഴ്ച 11.30ന് നെത്തല്ലൂര്‍ ക്ഷേത്രത്തിന് സമീപം കോട്ടയം റോഡിലായിരുന്നു സംഭവം.
Whatsapp Group 1 | Whatsapp Group 2 |Telegram Group
ലോട്ടറി ടിക്കറ്റുകളുമായി തോട്ടയ്ക്കാട് ഭാഗത്തേക്ക് പോകുമ്പോള്‍ ഹെല്‍മറ്റ് ധരിച്ച്‌ ബൈക്കിലെത്തിയ ആള്‍ ജോസഫിന് സമീപത്ത് ബൈക്ക് നിര്‍ത്തി 25 ടിക്കറ്റുകള്‍ തെരഞ്ഞെടുത്തു. തുടര്‍ന്ന് 1000 രൂപ വീതം സമ്മാനമടിച്ച നാല് ടിക്കറ്റുകള്‍ തന്‍റെ കൈവശമുണ്ടെന്നും പണം വേണമെന്നും ജോസഫിനോട് ആവശ്യപ്പെട്ടു.
1000 രൂപയേ കൈയിലുള്ളെന്ന് ജോസഫ് പറഞ്ഞപ്പോള്‍ 1000 രൂപ വാങ്ങുകയും 25 ടിക്കറ്റിന് പകരമായി 1000 രൂപയടിച്ച മറ്റൊരു ടിക്കറ്റുകൂടി നല്‍കി ഇയാള്‍ കറുകച്ചാല്‍ ഭാഗത്തേക്ക് പോയി. വീട്ടിലെത്തി ടിക്കറ്റ് പരിശോധിച്ചപ്പോളാണ് ലോട്ടറിയുടെ നമ്പറുകള്‍ തിരുത്തിയതാണെന്ന് തിരിച്ചറിഞ്ഞത്.
തട്ടിപ്പ് മനസിലായതോടെ ജോസഫ് കറുകച്ചാല്‍ പോലീസില്‍ പരാതി നല്‍കുകയായിരുന്നു.
