സ്വന്തം ലേഖിക
കൊച്ചി: സൂപ്പര്‍ ഹിറ്റ് ഗാനം ‘ദേവദൂതര്‍ പാടി’ വീണ്ടും വെള്ളിത്തിരയില്‍ എത്തിയതിന്റെ ആവേശത്തിലാണ് മലയാളികള്‍.
ഭരതന്‍റെ സംവിധാനത്തില്‍ 1985ല്‍ പുറത്തെത്തിയ കാതോട് കാതോരം എന്ന ചിത്രത്തിനു വേണ്ടി ഔസേപ്പച്ചന്‍ സംഗീതം പകര്‍ന്ന് യേശുദാസ്, കൃഷ്‍ണചന്ദ്രന്‍, ലതിക, രാധിക എന്നിവര്‍ ചേര്‍ന്ന് ആലപിച്ച ദേവദൂതര്‍ പാടി എന്ന ഗാനമാണ് ഇപ്പോള്‍ തരംഗമാകുന്നത്.
ചിത്രം പുറത്തിറങ്ങി 37 വര്‍ഷങ്ങള്‍ക്കു ശേഷം ഈ ഗാനം തരംഗം തീര്‍ക്കാന്‍ കാരണം മ്മടെ ചാക്കോച്ചനാണ്!
Whatsapp Group 1 | Whatsapp Group 2 |Telegram Group
താരത്തെ നായകനാക്കി രതീഷ് ബാലകൃഷ്ണന്‍ സംവിധാനം ചെയ്യുന്ന ന്നാ താന്‍ കേസ് കൊട് എന്ന ചിത്രത്തിലെ രംഗങ്ങള്‍ക്കുവേണ്ടിയാണ് സംവിധായകന്‍ ഈ ഹിറ്റ് ഗാനം പുനരുപയോഗിച്ചിരിക്കുന്നത്. ഉത്സവപ്പറമ്പിലെ ഗാനമേള ട്രൂപ്പ് പാടുന്ന ഈ ഗാനത്തിന് ചാക്കോച്ചന്റെ നായക കഥാപാത്രം വച്ചിരിക്കുന്ന ചുവടുകളാണ് വീഡിയോയെ വൈറല്‍ ആക്കിയത്. ഇപ്പോഴിതാ വൈറലാകുന്ന പ്രകടനത്തെക്കുറിച്ച്‌ ഒരു പ്രമുഖ മാധ്യമത്തോട് സംസാരിക്കുകയാണ് കുഞ്ചാക്കോ ബോബന്‍.
ചാക്കോച്ചന്റെ വാക്കുകള്‍:
“സന്തോഷമുണ്ട്, അതിനേക്കാളുപരി ആശ്വസവും. കാരണം ആളുകളുടെ മനസ്സില്‍ അത്രയ്ക്കും ആവേശം പകര്‍ന്നിരിക്കുന്ന, എപ്പോഴും മൂളിക്കൊണ്ടിരിക്കുന്ന ഗാനമാണ് ദൈവദൂതര്‍ പാടി. നമ്മളൊരു റീക്രിയേഷന്‍ എന്ന നിലയില്‍ ചെയ്യമ്പോള്‍, ആ പാട്ടിന്റെ ആത്മാവ് നഷ്ടപ്പെടാത്ത രീതിയില്‍ ചെയ്യണം എന്നുണ്ടായിരുന്നു. അത് ഏറ്റവും നല്ല രീതിയില്‍ തന്നെ വന്നു. ഗാനം റീലീസ് ആയി കഴിഞ്ഞ് ഔസേപ്പച്ചന്‍ സാര്‍ വിളിച്ചിരുന്നു. പുള്ളിക്ക് ഭയങ്കര സന്തോഷമായി എന്നൊക്കെ പറഞ്ഞു. വര്‍ഷങ്ങള്‍ക്ക് മുൻപ് അദ്ദേഹം ഈണമിട്ട ഗാനം വീണ്ടും വരുന്നു, അത് ആളുകള്‍ ഏറ്റെടുക്കുന്നു എന്നതില്‍ ഒത്തിരി സന്തോഷമാണ്. മമ്മൂക്ക പാട്ട് കണ്ട് ഐ ലൗ യൂ എന്ന് പറഞ്ഞു. ഇതില്‍ ഏറ്റവും വലിയൊരു കാര്യമെന്ന് പറഞ്ഞാല്‍, ഈ പാട്ട് കേട്ടിട്ട് ആളുകള്‍ തിയറ്ററില്‍ വന്ന് സിനിമ കാണും എന്ന നിലയിലേക്ക് എത്തിയിരിക്കുകയാണ്”, ചാക്കോച്ചന്‍ പറയുന്നു.
“ന്നാ താന്‍ കേസ് കൊട് എന്ന ചിത്രത്തിലെ എന്റെ കഥാപാത്രം ഒരു മുന്‍കാല കള്ളനാണ്. പക്ഷേ ഇപ്പോള്‍ ഡീസന്റ് ആയിട്ട് ജീവിക്കുന്നു. പുള്ളിക്ക് ഈ പെരുന്നാള്‍, ഉത്സവ പറമ്പുകളിലൊക്കെ പോയി ഗാനമേള ആസ്വദിക്കുക എന്നൊരു സ്വഭാവമുണ്ട്. ആള്‍ക്കൂട്ടത്തിനിടയില്‍ അദ്ദേഹം സ്വന്തമായൊരു സ്പേയ്സ് ഉണ്ടാക്കി ഡാന്‍സ് കളിക്കുന്നു. എല്ലാം താളം തെറ്റിയ സ്റ്റെപ്പുകളായിരിക്കും. ഇത്തരത്തില്‍ ആള്‍ക്കൂട്ടത്തിനിടയില്‍ ഡാന്‍സ് കളിക്കുന്നൊരാളുടെ റഫറന്‍സ് എനിക്ക് സംവിധായകന്‍ രതീഷ് തന്നിരുന്നു. പുള്ളി കൊറിയോഗ്രാഫര്‍ വേണമോന്ന് ചോദിച്ചു. എന്നാല്‍ കൊറിയോഗ്രാഫി ഇല്ലാതെ നമുക്ക് ചെയ്ത് നോക്കാമെന്ന് ഞാന്‍ പറഞ്ഞു. ഷോട്ട് റെഡിയായപ്പോള്‍ കണ്ണും പൂട്ടിപ്പിടിച്ചങ്ങ് ചെയ്യുകയായിരുന്നു. തെറ്റിക്കുക എന്നതായിരുന്നു ഈ ഡാന്‍സിന്റെ കറക്‌ട്. അപ്പോഴുള്ള തോന്നലിലാണ് ആ സ്റ്റെപ്പുകള്‍ ചെയ്തത്, അതിനെ ഡാന്‍സ് എന്ന് പറയാമെങ്കില്‍. ദൈവം സഹായിച്ച്‌ എല്ലാം ശരിയായി വന്നു”, കുഞ്ചാക്കോ ബോബന്‍ പറഞ്ഞവസാനിപ്പിക്കുന്നു.
ആന്‍ഡ്രോയ്ഡ് കുഞ്ഞപ്പന്‍, കനകം കാമിനി കലഹം എന്നീ സിനിമകളിലൂടെ പ്രേക്ഷകശ്രദ്ധ രതീഷ് ബാലകൃഷ്ണന്‍ ആണ് ചിത്രത്തിന്‍റെ സംവിധാനം. സൂപ്പര്‍ ഡീലക്സ് ഉള്‍പ്പെടെയുള്ള ചിത്രങ്ങളിലൂടെ ശ്രദ്ധനേടിയ തമിഴ് താരം ഗായത്രി ശങ്കര്‍ ചിത്രത്തില്‍ ഒരു പ്രധാന വേഷത്തില്‍ എത്തുന്നുണ്ട്. ഗായത്രിയുടെ ആദ്യ മലയാള ചിത്രമാണിത്. ആന്‍ഡ്രോയ്ഡ് കുഞ്ഞപ്പനിലും കനകം കാമിനി കലഹത്തിലും ശ്രദ്ധേയ കഥാപാത്രങ്ങളെ അവതരിപ്പിച്ച രാജേഷ് മാധവനാണ് മറ്റൊരു ശ്രദ്ധേയ കഥാപാത്രത്തെ അവതരിപ്പിക്കുന്നത്. വിനയ് ഫോര്‍ട്ട്, ജാഫര്‍ ഇടുക്കി, സൈജു കുറുപ്പ് എന്നിവരും അഭിനയിക്കുന്നു. കൊഴുമ്മല്‍ രാജീവന്‍ അഥവാ അംബാസ് രാജീവന്‍ എന്നാണ് ചിത്രത്തില്‍ കുഞ്ചാക്കോ ബോബന്‍ അവതരിപ്പിക്കുന്ന കഥാപാത്രത്തിന്‍റെ പേര്.
