ആവശ്യപ്പെട്ട സ്ഥലത്ത് ബസ് നിർത്തിയില്ല, കെ.എസ്.ആർ.ടി.സി ബസിന്റെ ചില്ല് യാത്രക്കാരൻ എറിഞ്ഞു പൊട്ടിച്ചു ; ബസ് ജീവനക്കാർ പൊലീസിൽ പരാതി നൽകി

സ്വന്തം ലേഖകൻ

പൊന്നാനി: ആവശ്യപ്പെട്ട സ്ഥലത്തു ബസ് നിർത്താത്തതിന്റെ പേരിൽ കെ.എസ്.ആർ.ടി.സി ബസിന്റെ ചില്ല് യാത്രക്കാരൻ കല്ലുകൊണ്ട് എറിഞ്ഞു പൊട്ടി. പാലപ്പെട്ടി സ്വാമിപ്പടിയിൽ കഴിഞ്ഞ ദിവസം വൈകുന്നേരത്തോടെയാണ് സംഭവം.

കോഴിക്കോട് നിന്ന് ഗുരുവായൂരിലേക്ക് സർവീസ് നടത്തുന്ന കെഎസ്ആർടിസി ബസിന്റെ പിന്നിലെ ചില്ലാണ് ആവശ്യപ്പെട്ട സ്ഥലത്ത് നിർത്തിയില്ലെന്ന് ആരോപിച്ച് ബസിൽ നിന്നും ഇറങ്ങിയതിനുശേഷം യാത്രക്കാരൻ കല്ലുകൊണ്ട് എറിഞ്ഞു തകർത്തത്. കല്ല് എറിഞ്ഞതിന് ശേഷം ഇയാൾ സ്ഥലത്ത് നിന്നും ഓടി രക്ഷപ്പെടുകയായിരുന്നു.

പൊന്നാനി-ചാവക്കാട് ദേശീയ പാതയിലെ പുതിയിരുത്തിയിൽ ഇറങ്ങാൻ യാത്രക്കാരൻ ആവശ്യപ്പെട്ടെങ്കിലും ബസിന് ഇവിടെ സ്റ്റോപ്പ് ഇല്ലായിരുന്നു. തുടർന്ന് ഇയാൾ ബഹളം വെച്ചതോടെ പാലപ്പെട്ടി സ്വാമിപ്പടിയിൽ ബസ് നിർത്തുകയായിരുന്നു.

് ബസിൽ നിന്നും ഇറങ്ങിയ ഉടനെ യാത്രക്കാരൻ റോഡരികിൽ കിടന്ന് കല്ല് എടുത്ത് ചില്ലിന് എറിയുകയായിരുന്നെന്ന് ബസ് ജീവനക്കാർ പറഞ്ഞു. സംഭവത്തെ തുടർന്ന് പെരുമ്പടപ്പ് പൊലീസിൽ പരാതി നൽകുകയും ചെയ്തു.