ബസിൽ കയറുന്നതിനിടെ മുമ്പോട്ടെടുത്തു; തിരുവനന്തപുരത്ത് കെഎസ്ആർടിസി ബസ് കാലിലൂടെ കയറിയിറങ്ങി വയോധികന് ഗുരുതര പരിക്ക്

തിരുവനന്തപുരം: തിരുവനന്തപുരം പോത്തൻകോട് കെഎസ്ആർടിസി ബസ് കാലിൽ കൂടി കയറിയിറങ്ങി വയോധികന് ഗുരുതര പരിക്കേറ്റു.

പോത്തൻകോട് ചാരുംമൂട്ടിൽ ഉച്ചയ്ക്ക് പന്ത്രണ്ടേ കാലിനായിരുന്നു അപകടം. ചാരുംമൂട് സ്വദേശി സുകുമാരന് (72) ആണ് പരിക്കേറ്റത്.

കെഎസ്ആർടിസി ലോ ഫ്ലോർ ബസിൽ കയറുന്നതിനിടെ ബസ് മുമ്പോട്ട് എടുത്തപ്പോൾ സുകുമാരൻ തെന്നി വീഴുകയായിരുന്നു.

ബസിനടിയിൽപ്പെട്ട സുകുമാരൻ്റെ കാലിൽ കൂടി ബസ് കയറിയിറങ്ങി. പോത്തൻകോട് നിന്നും കിഴക്കേകോട്ടയിലേയ്ക്ക് പോയ ബസായിരുന്നു. പരിക്കേറ്റ സുകുമാരനെ മെഡിക്കൽ കോളേജിലേക്ക് മാറ്റി.

കെഎസ്ആർടിസി ബസ് കുത്തനെയുള്ള കയറ്റത്തിൽ എഞ്ചിൻ ഓഫായി പിന്നോട്ടുരുണ്ട് റബ്ബർതോട്ടത്തിലേക്ക് കയറി; അറുപതോളം പേരുടെ ജീവൻ രക്ഷപെട്ടത് തലനാരിഴയ്ക്ക്

സ്വന്തം ലേഖകൻ

കാഞ്ഞിരപ്പള്ളി: കുത്തനെയുള്ള കയറ്റത്തിൽ എൻജിൻ ഓഫായി കെഎസ്്ആർടിസി ബസ് പിന്നോട്ടുരുണ്ടു. റബർ മരത്തിൽ തട്ടിനിന്നതിനാൽ ദുരന്തം ഒഴിവായി. അറുപതോളം പേരുടെ ജീവൻ രക്ഷപെട്ടത് തലനാരിഴയ്ക്ക്. പാറത്തോട്ടിൽനിന്ന് പാലപ്ര ടോപ്പിലേക്ക് പോകുകയായിരുന്ന കെ.എസ്.ആർ.ടി.സി ബസാണ് അപകടത്തിൽപെട്ടത്. തിങ്കളാഴ്ച വൈകീട്ട് 4.30ന് കാലായിൽ വളവിലായിരുന്നു അപകടം. സ്ത്രീകളും കുട്ടികളുമടക്കം അറുപതിൽപരം യാത്രക്കാരുമായി പാലപ്ര കയറ്റം കയറുകയായിരുന്നു ബസ്. കുത്തനെയുള്ള കയറ്റത്തിൽ ഗിയർ വീഴാതെവരുകയും ബ്രേക്ക് ലഭിക്കാതെ വരുകയുമായിരുന്നു. ബസിന്റെ എൻജിൻ നിന്നുപോയെന്നും ജീവനക്കാർ പറഞ്ഞു. ബഹളംകേട്ട് ഓടിയെത്തിയ നാട്ടുകാരാണ് യാത്രക്കാരെ പുറത്തിറക്കിയത്.