കോട്ടയം: കോടിമത പാലത്തിന്റെ അപ്രോച്ച് റോഡിൽ അറ്റകുറ്റപ്പണികൾ നടത്തുന്നതിനാൽ നാളെ (02.07.2026) മുതൽ ഒരാഴ്ചത്തേക്ക് കടുത്ത ഗതാഗത നിയന്ത്രണങ്ങൾ ഏർപ്പെടുത്തി.
ജില്ലാ കളക്ടറുടെ നിർദ്ദേശപ്രകാരം രാവിലെ 10.00 മണി മുതലാണ് നിയന്ത്രണങ്ങൾ ആരംഭിക്കുന്നത്. പാലം വഴിയുള്ള ഗതാഗതം പൂർണ്ണമായും നിരോധിച്ചിരിക്കുന്നതിനാൽ ഇതുവഴി കടന്നുപോകേണ്ട വാഹനങ്ങൾക്കായി വിവിധ ബദൽ പാതകൾ പോലീസ് ക്രമീകരിച്ചിട്ടുണ്ട്.
പ്രധാന പാതയിലെ തടസ്സം കണക്കിലെടുത്ത് നഗരത്തിലേക്കുള്ള പ്രവേശനം പലയിടങ്ങളിലും വഴിതിരിച്ചുവിടും.
Whatsapp Group 1 | Whatsapp Group 2 |Telegram Group
ദീർഘദൂര യാത്രക്കാർക്കും ചരക്ക് വാഹനങ്ങൾക്കുമായി വിപുലമായ ക്രമീകരണങ്ങളാണ് ഏർപ്പെടുത്തിയിരിക്കുന്നത്.
തിരുവനന്തപുരം ഭാഗത്തുനിന്ന് എറണാകുളത്തേക്ക് പോകേണ്ട ചരക്ക് വാഹനങ്ങളും സ്വകാര്യ വാഹനങ്ങളും ളായിക്കാട് ബൈപ്പാസ് ജംഗ്ഷനിൽ നിന്ന് തിരിഞ്ഞ് തെങ്ങണ, പുതുപ്പള്ളി, മണർകാട് ബൈപ്പാസ് വഴി ഏറ്റുമാനൂർ പട്ടിത്താനത്ത് എത്തണം.
എറണാകുളത്ത് നിന്ന് തിരുവനന്തപുരത്തേക്ക് വരുന്ന വാഹനങ്ങൾ പട്ടിത്താനം ജംഗ്ഷനിൽ നിന്ന് ബൈപ്പാസ് വഴി മണർകാട്, പുതുപ്പള്ളി വഴി തെങ്ങണയിലെത്തി യാത്ര തുടരണം.
അന്തർ സംസ്ഥാന സർവീസ് നടത്തുന്ന ബസുകൾ കോട്ടയം ടൗൺ പൂർണ്ണമായും ഒഴിവാക്കി മണർകാട്, ഏറ്റുമാനൂർ ഭാഗങ്ങളിൽ യാത്രക്കാരെ കയറ്റുന്ന രീതിയിൽ ക്രമീകരണങ്ങൾ ചെയ്യേണ്ടതാണ്.
ചങ്ങനാശ്ശേരി ഭാഗത്തുനിന്ന് കോട്ടയം ടൗൺ, മെഡിക്കൽ കോളേജ്, ഏറ്റുമാനൂർ ഭാഗങ്ങളിലേക്ക് പോകേണ്ട കെഎസ്ആർടിസി, സ്വകാര്യ ബസുകൾ സിമന്റ് കവലയിൽ നിന്ന് ഇടത്തേക്ക് തിരിഞ്ഞ് പാറേച്ചാൽ ബൈപ്പാസ്, തിരുവാതുക്കൽ, അറുത്തൂട്ടി വഴി ചാലുകുന്ന് ജംഗ്ഷനിലെത്തി പോകണം.
കോട്ടയം ടൗണിൽ നിന്ന് ചങ്ങനാശ്ശേരി ഭാഗത്തേക്ക് പോകേണ്ട ബസുകൾ കഞ്ഞിക്കുഴി ജംഗ്ഷനിൽ എത്തി കൊല്ലാട്, കടുവാക്കുളം വഴി യാത്ര തുടരണം. പുതുപ്പള്ളി, മണർകാട് ഭാഗങ്ങളിലേക്ക് പോകേണ്ട സ്വകാര്യ വാഹനങ്ങൾ മണിപ്പുഴ ജംഗ്ഷനിൽ നിന്ന് തിരിഞ്ഞ് കടുവാക്കുളം, കൊല്ലാട് വഴി പോകേണ്ടതാണ്.
അടിയന്തര സാഹചര്യങ്ങൾക്കായി പ്രത്യേക പാത നിശ്ചയിച്ചിട്ടുണ്ട്. ചങ്ങനാശ്ശേരി ഭാഗത്തുനിന്ന് ജില്ലാ ആശുപത്രിയിലേക്കും മെഡിക്കൽ കോളേജിലേക്കും പോകേണ്ട ആംബുലൻസുകളും മറ്റ് എമർജൻസി വാഹനങ്ങളും മണിപ്പുഴ ജംഗ്ഷനിൽ നിന്ന് വലത്തേക്ക് തിരിഞ്ഞ് ഈരയിൽ കടവ് ബൈപ്പാസ് വഴി മനോരമ ജംഗ്ഷനിലെത്തി പോകണം.
നഗരത്തിലെ ഗതാഗതക്കുരുക്ക് ഒഴിവാക്കാൻ യാത്രക്കാർ നിർദ്ദേശിക്കപ്പെട്ട ബദൽ പാതകൾ കൃത്യമായി പിന്തുടരണമെന്ന് അധികൃതർ അറിയിച്ചു.
പാലം വഴിയുള്ള നിയന്ത്രണം ഒരാഴ്ച നീണ്ടുനിൽക്കുമെന്നതിനാൽ യാത്രക്കാർ സമയം മുൻകൂട്ടി ക്രമീകരിക്കേണ്ടതാണെന്നും കളക്ടർ അറിയിച്ചു.
