കോട്ടയം മെഡിക്കൽ കോളേജ് മോർച്ചറിയിൽ ഫോട്ടോഗ്രാഫറുടെ തീവട്ടിക്കൊള്ള..! ഇൻക്വസ്റ്റ് നടപടികൾക്കായി എത്തിക്കുന്ന മൃതദേഹത്തിന്റെ ഫോട്ടോയെടുക്കുന്നതിന് ഈടാക്കുന്നത് 4000 രൂപ…! പ്രതിദിനമെടുക്കുന്നത് പത്തിലധികം മൃതദേഹങ്ങളുടെ ഫോട്ടോ; തട്ടുന്നത് ആയിരങ്ങൾ..! തീവട്ടിക്കൊള്ളയിൽ ബലിയാടാകുന്നതാകട്ടെ മരിച്ചയാളിന്റെ ബന്ധുക്കളും പൊതുപ്രവർത്തകരും; കൊള്ളപ്പിരിവിന് നേരെ കണ്ണടച്ച് ആശുപത്രി അധികാരികൾ..! തേർഡ് ഐ ന്യൂസ് അന്വേഷണം !

സ്വന്തം ലേഖകൻ

കോട്ടയം : കോട്ടയം മെഡിക്കൽ കോളേജ് മോർച്ചറിയിൽ ഫോട്ടോഗ്രാഫറുടെ തീവെട്ടിക്കൊള്ള.

ആത്മഹത്യയും കൊലപാതകവുമടക്കം പൊലീസിന് സംശയമുള്ള ദുരൂഹമരണങ്ങളുടെ ഇൻക്വസ്റ്റ് തയ്യാറാക്കുന്നതിന്റെ ഭാഗമായി മൃതദേഹങ്ങളുടെ ഫോട്ടോ എടുക്കുന്നതിനാണ് നാലായിരം രൂപ ഫോട്ടോഗ്രാഫർ ഈടാക്കുന്നത്.

മുൻപ് 1000 രൂപയായിരുന്നിടത്തു നിന്നാണ് ഒറ്റയടിക്ക് 4000 രൂപയായത്. എത്രയും പെട്ടന്ന് പോസ്റ്റ്മോർട്ടം നടപടികൾ തീർത്ത് മൃതദേഹം വീട്ടിലെത്തിച്ച് സംസ്കരിക്കേണ്ടതിനാൽ മരിച്ചയാളിന്റെ ബന്ധുക്കളോ, പൊതുപ്രവർത്തകരോ, പൊലീസോ പരാതി പറയാറില്ല.

കേവലം നാലോ അഞ്ചോ ഫോട്ടോ എടുത്ത് നൽകുന്നതിനാണ് ഇവർ ഈ കൊള്ള നടത്തുന്നത്

ദിനം പ്രതി പത്തോളം മൃതദേഹങ്ങളുടെ ഫോട്ടോയാണ് ഇയാൾ എടുക്കുന്നത്. പ്രതിദിനം ഇവർ കൊള്ളയടിക്കുന്നതാകട്ടെ 40,000ലധികം രൂപയാണ്. ഇത്തരത്തിൽ കൊള്ളയടിക്കുന്നതിന്റെ ഒരു വിഹിതം മെഡിക്കൽ കോളേജിലെ ചില പ്രധാനികൾ കൈപ്പറ്റുന്നതായും സൂചനയുണ്ട്.

ഇക്കാരണത്താലാണ് ഈ തീവെട്ടിക്കൊള്ള നിർബാധം തുടരുന്നതും ഉത്തരവാദിത്വപ്പെട്ടവർ ഈ പകൽ കൊള്ളയ്ക്ക് നേരെ കണ്ണടയ്ക്കുന്നതും !