കട്ടപ്പനയിൽ സ്ഫോടക വസ്തുക്കളുടെ വൻ ശേഖരവുമായി ഈരാറ്റുപേട്ട സ്വദേശി പോലീസ് പിടിയിൽ ; പിടികൂടിയത് 300 ഇലക്ട്രിക് ഡിറ്റനേറ്ററും 200 ജലാറ്റിൻ സ്റ്റിക്കുകളും

ഇടുക്കി : കട്ടപ്പനയിൽ വൻ സ്ഫോടക വസ്തുക്കളുടെ ശേഖരം പിടികൂടി. ഈരാറ്റുപേട്ട സ്വദേശി നടക്കൽ കണ്ടത്തിൽ വീട്ടിൽ ഷിബിലി (43) ആണ് പിടിയിലായിരിക്കുന്നത്.

ഇയാളിൽ നിന്ന് 300 ഇലക്ട്രിക് ഡിറ്റനേറ്റർ, 200 ജനാറ്റിൻ സ്റ്റിക് എന്നിവയാണ് പിടികൂടിയത്. അനധികൃതമായി ഖനന പ്രവർത്തനങ്ങൾ നടത്തുന്നവർക്ക് നൽകാനായി കൊണ്ടുവന്നതാണ് ഈ സ്ഫോടക വസ്തുക്കൾ എന്നാണ് പോലീസ് പറയുന്നത്.

ജില്ലാ പോലീസ് മേധാവി വിഷ്ണു പ്രദീപ് ഐപിഎസിന്റെ നിർദ്ദേശപ്രകാരം കട്ടപ്പന ഡിവൈഎസ്പി വി എ നിഷാദ്മോൻ്റെ നേതൃത്വത്തിൽ നടത്തിയ പരിശോധനയിലാണ് സ്ഫോടക വസ്തുക്കളുമായി ഇയാൾ പിടിയിലായത്.

എസ്എച്ച്ഒ ഷൈൻ കുമാർ , എസ്ഐമാരായ ബിനോയ് എബ്രഹാം, പ്രകാശ്, സിപിഒമാരായ ഫൈസൽ, രേവതി, സൽജോമോൻ എന്നിവർ ചേർന്നാണ് പ്രതിയെ പിടികൂടിയത്.