ശരീരത്തിലെ മെറ്റബോളിസം, വിഷാംശങ്ങൾ നീക്കം ചെയ്യൽ, ദഹനം, അത്യാവശ്യ പ്രോട്ടീനുകളുടെ ഉത്പാദനം എന്നിവയ്ക്ക് കരൾ നിശബ്ദമായി മേൽനോട്ടം വഹിക്കുന്നു.
എന്നാൽ, ആധുനിക ജീവിതശൈലിയിലെ മോശം ഭക്ഷണക്രമം, വിട്ടുമാറാത്ത മാനസിക സമ്മർദ്ദം, ഉറക്കമില്ലായ്മ എന്നിവ മദ്യം കഴിക്കാത്തവരിൽ പോലും മെറ്റബോളിക് തകരാറുകൾ വർധിക്കുന്നതിന് കാരണമാകുന്നുണ്ടെന്ന് മെഡിക്കൽ വിദഗ്ധർ മുന്നറിയിപ്പ് നൽകുന്നു.
തുടക്കത്തിൽ പ്രകടമായ ലക്ഷണങ്ങളൊന്നും കാണിക്കാതെ തന്നെ അവ നിശബ്ദമായി കരളിനെ നശിപ്പിക്കുകയും ചെയ്യും. കഴിക്കുന്ന ഭക്ഷണമാണ് നിങ്ങളുടെ കരളിന് എത്രത്തോളം ജോലിഭാരമുണ്ടെന്ന് നിശ്ചയിക്കുന്നത്.
Whatsapp Group 1 | Whatsapp Group 2 |Telegram Group
മദ്യം കരളിനെ നശിപ്പിക്കുന്ന ഒരു പ്രധാന ഘടകമാണെന്ന് എല്ലാവർക്കും അറിയാം, എന്നാൽ നാം ദിവസേന കഴിക്കുന്ന ഭക്ഷണങ്ങളും കരളിന്റെ ദീർഘകാല പ്രവർത്തനത്തെ കാര്യമായി ബാധിക്കുന്നുണ്ട്.
ഭക്ഷണക്രമം
കരളിന്റെ ആരോഗ്യത്തെ സ്വാധീനിക്കുന്ന ഏറ്റവും പ്രധാനപ്പെട്ട ഘടകങ്ങളിലൊന്നാണ് ഭക്ഷണക്രമം. സംസ്കരിച്ച ഭക്ഷണങ്ങൾ (processed foods), കൂടിയ അളവിലുള്ള പഞ്ചസാര, ശുദ്ധീകരിച്ച കാർബോഹൈഡ്രേറ്റുകൾ (refined carbohydrates), വറുത്തതും പൊരിച്ചതുമായ ഭക്ഷണങ്ങൾ,
അനാരോഗ്യകരമായ കൊഴുപ്പുകൾ എന്നിവ അമിതമായി കഴിക്കുകയും പ്രോട്ടീന്റെ അളവ് കുറയുകയും ചെയ്യുന്ന രീതിയിലുള്ള തെറ്റായ ഭക്ഷണശീലങ്ങൾ കരളിൽ കൊഴുപ്പ് അടിഞ്ഞുകൂടാൻ കാരണമാകും.
അതേസമയം പഴങ്ങൾ, പച്ചക്കറികൾ, തവിടു കളയാത്ത ധാന്യങ്ങൾ, കൊഴുപ്പ് കുറഞ്ഞ പ്രോട്ടീനുകൾ, ആരോഗ്യകരമായ കൊഴുപ്പുകൾ എന്നിവ അടങ്ങിയ സമീകൃതാഹാരം കരളിന്റെ പ്രവർത്തനത്തെ സഹായിക്കുകയും വീക്കംകുറയ്ക്കാൻ സഹായിക്കുകയും ചെയ്യും.
ഭക്ഷണശീലങ്ങൾ മൂലമുണ്ടാകുന്ന ഈ നിരന്തരമായ സമ്മർദ്ദം കരളിന്റെ പ്രവർത്തന വേഗതയെ സാവധാനത്തിലാക്കുന്നു.
വറുത്ത ഭക്ഷണങ്ങൾ, പഞ്ചസാര, പാക്കറ്റ് ലഘുഭക്ഷണങ്ങൾ എന്നിവ അമിതമായി അടങ്ങിയ ഭക്ഷണക്രമം, കൊഴുപ്പും വിഷാംശങ്ങളും സംസ്കരിക്കുന്നതിനായി കരളിനെ കൂടുതൽ കഠിനമായി ജോലി ചെയ്യാൻ പ്രേരിപ്പിക്കുന്നു.
കാലക്രമേണ, ഇത് കരളിൽ കൊഴുപ്പ് അടിഞ്ഞുകൂടുന്നതിനും അതിന്റെ പ്രവർത്തന ശേഷി കുറയുന്നതിനും കാരണമാകും. ദൈനംദിന ഭക്ഷണശീലങ്ങളിൽ വരുത്തുന്ന ചെറിയ മാറ്റങ്ങൾക്ക് പോലും കരളിന്റെ സമ്മർദ്ദം കുറയ്ക്കാനും അതിനെ സുഗമമായി പ്രവർത്തിപ്പിക്കാനും സാധിക്കും.
ഉറക്കക്കുറവ്
മസ്തിഷ്കത്തിന് വിശ്രമം നൽകാനുള്ള ഒരു സമയമായി മാത്രമാണ് പലപ്പോഴും ഉറക്കത്തെ കാണാറുള്ളത്. എന്നാൽ കരളിനെ സംബന്ധിച്ചിടത്തോളം ഇത് മെറ്റബോളിക് തകരാറുകൾ പരിഹരിക്കാനും വീണ്ടെടുപ്പ് നടത്താനുമുള്ള ഏറ്റവും പ്രധാനപ്പെട്ട സമയമാണ്.
മിക്ക ആളുകളും കരുതുന്നതിനേക്കാൾ വലിയ പങ്കാണ് ഉറക്കവും മാനസിക സമ്മർദ്ദവും കരളിന്റെ ആരോഗ്യത്തിൽ വഹിക്കുന്നത്. ആവശ്യത്തിന് ഉറക്കം ലഭിക്കാതെ വരുമ്പോൾ,
കേടുപാടുകൾ തീർക്കാനും പുനഃക്രമീകരിക്കാനും ശരീരത്തിന് ആവശ്യമായ സമയം ലഭിക്കാതെ വരുന്നു. ഇത് കരളിന്റെ പ്രവർത്തനത്തെ ദോഷകരമായി ബാധിക്കും.
ക്രമരഹിതമായ ഉറക്കശീലങ്ങൾ, വൈകി ഉറങ്ങുന്നത്, രാത്രി വൈകിയും ശേഷവും സ്ക്രീനുകക്ൾ നോക്കിയിരിക്കുന്നത് എന്നിവ ശരീരത്തിന്റെ ജൈവഘടികാരത്തെ (biological clock) ബാധിച്ചേക്കാം. ശരീരത്തിലെ മെറ്റബോളിസം, വിവിധ ഹോർമോൺ സന്തുലിതാവസ്ഥ തുടങ്ങിയ പ്രക്രിയകളെ നിയന്ത്രിക്കുന്നത് ഈ ജൈവഘടികാരമാണ്.
ഉറക്കം തങ്ങളുടെ ആരോഗ്യത്തെ എങ്ങനെ ബാധിക്കുന്നുവെന്ന് തിരിച്ചറിയാൻ പലർക്കും കഴിയാറില്ല. വിട്ടുമാറാത്ത ഉറക്കക്കുറവും മോശം ഉറക്കവും മെറ്റബോളിക് പ്രവർത്തനങ്ങളെ തകിടം മറിക്കുകയും ഇൻസുലിൻ പ്രതിരോധം (insulin resistance) വർധിപ്പിക്കുകയും ചെയ്യുന്നു,
ഇത് കരളിന്റെ ആരോഗ്യത്തെ ബാധിക്കും. ശരീരത്തിന് ആവശ്യത്തിന് ഉറക്കം ആവശ്യമാണ്, കാരണം ഇത് കരളിന്റെ സ്വാഭാവികമായ പ്രക്രിയകളെ സംരക്ഷിക്കുകയും, ശരീരത്തെ വീക്കത്തിൽ നിന്നും (inflammation) കൊഴുപ്പ് അടിഞ്ഞുകൂടുന്നതിൽ നിന്നും മുക്തമാക്കാൻ സഹായിക്കുകയും ചെയ്യുന്നു.
ഉറക്കക്കുറവ് കരളിൽ കൊഴുപ്പ് അടിഞ്ഞുകൂടാനുള്ള (fatty liver) സാധ്യതയേറുന്നതുമായി നേരിട്ട് ബന്ധപ്പെട്ടിരിക്കുന്നു. ഫാറ്റി ലിവർ പുരോഗമിക്കാൻ അനുവദിച്ചാൽ, അത് മാഷ് എന്ന ഗുരുതരമായ ഘട്ടത്തിലേക്ക് പുരോഗമിക്കുമെന്ന് ഡോക്ടർമാർ പറയുന്നു.
കരൾ വീർക്കാൻ തുടങ്ങുകയും അതിന്റെ കോശങ്ങൾ വഷളാകാൻ തുടങ്ങുകയും ചെയ്യുന്ന അവസ്ഥയാണിത്. ലിവർ ഫൈബ്രോസിസ് ഉണ്ടാകാനുള്ള സാധ്യതയും വർധിപ്പിക്കുന്നു. ഈ അവസ്ഥ കരൾ കാൻസറിലേക്ക്, പ്രത്യേകിച്ച് ഹെപ്പറ്റോസെല്ലുലാർ കാർസിനോമയിലേക്ക് നയിച്ചേക്കാം.
