രണ്ടു വർഷത്തിനിടെ ഒരിക്കൽ പോലും ഗൂഗിൾ അക്കൗണ്ട് ഉപയോഗിക്കുകയോ സൈൻ ഇൻ ചെയ്യുകയോ ചെയ്തിട്ടില്ലെങ്കിലാണ് പണി പാളും ; അടുത്ത മാസത്തോടെ ദശലക്ഷക്കണക്കിന് ജി-മെയിൽ അക്കൗണ്ടുകൾ ഗൂഗിൾ ഡിലീറ്റ് ചെയ്യും

സ്വന്തം ലേഖകൻ 

കുറേ കാലമായി ഉപയോഗിക്കാത്ത ജി-മെയിൽ അക്കൗണ്ടുകൾ അടുത്ത മാസത്തോടെ ഗൂഗിൾ ഡിലീറ്റ് ചെയ്യാനൊരുങ്ങുന്നു. ഏതാണ്ട് രണ്ടുവർഷമായി നിഷ്ക്രിയമായി തുടരുന്ന ജി-മെയിൽ അക്കൗണ്ടുകളാണ് ഡിസംബറോടെ ഗൂഗിൾ നിർജീവമാക്കാനൊരുങ്ങുന്നത്.

ഇങ്ങനെ നിർജീവമായി കിടക്കുന്ന അക്കൗണ്ടുകളുടെ എണ്ണം ദശലക്ഷക്കണക്കിന് വരും. രണ്ടു വർഷത്തിനിടെ ഒരിക്കൽ പോലും ഗൂഗിൾ അക്കൗണ്ട് ഉപയോഗിക്കുകയോ സൈൻ ഇൻ ചെയ്യുകയോ ചെയ്തിട്ടില്ലെങ്കിലാണ് പണി പാളുക.

ജി​-മെയിൽ, ഡോക്‌സ്, ഡ്രൈവ്, ഗൂഗിൾ മീറ്റ്, കലണ്ടർ, ഗൂഗിൾ ഫോട്ടോസ് എന്നിവയിലെ ഉള്ളടക്കം ഉൾപ്പെടെ ഇല്ലാതാകും. നിർജീവ അക്കൗണ്ടുകൾ സജീവ അക്കൗണ്ടുകളേക്കാൾ അപകടകരമാണെന്നാണ് ഗൂഗിൾ കരുതുന്നത്.

ഇത്തരം അക്കൗണ്ടുകൾ മറ്റാളുകൾ അപഹരിച്ചാൽ പല കുറ്റകൃത്യങ്ങൾക്കും ഉപയോഗിക്കാനും സാധ്യതയുണ്ട്. എന്നാൽ, സ്കൂളുകൾ, വ്യാപാര സ്ഥാപനങ്ങൾ തുടങ്ങിയവയു​ടെ അക്കൗണ്ടുകളെ ഇത് ബാധിക്കില്ല.

ഗൂഗിൾ അക്കൗണ്ട് സജീവമായി നിലനിർത്താനുള്ള ഏറ്റവും ലളിതമായ മാർഗം രണ്ട് വർഷത്തിലൊരിക്കൽ സൈൻ ഇൻ ചെയ്യുക എന്നതാണ്. ജി-മെയിൽ വായിക്കുക, യൂട്യൂബ് വിഡിയോ കാണുക, ഗൂഗിൾ പ്ലേ സ്റ്റോറിൽ ആപ്പ് ഡൗൺലോഡ് ചെയ്യുക എന്നതൊക്കെ അക്കൗണ്ട് സജീവമാക്കാനുള്ള മാർഗങ്ങളാണ്.