2029ലെ ലോക്‌സഭാ തെരഞ്ഞെടുപ്പ്; വനിതകള്‍ക്ക് 33 ശതമാനം സംവരണം ഏര്‍പ്പെടുത്തുമെന്ന് കേന്ദ്രം

ഡല്‍ഹി: 2029 ലെ പൊതുതെരഞ്ഞെടുപ്പിന് മുന്നോടിയായി ലോക്‌സഭയിലും സംസ്ഥാന അസംബ്ലികളിലും സ്ത്രീകള്‍ക്ക് 33 ശതമാനം സംവരണം ഏർപ്പെടുത്താൻ പദ്ധതിയിട്ട് കേന്ദ്രം.

ദേശീയ രാഷ്ട്രീയത്തില്‍ സ്ത്രീ പ്രാതിനിധ്യം വർദ്ധിപ്പിക്കുന്നതിനും ലിംഗസമത്വം പ്രോത്സാഹിപ്പിക്കുന്നതിനുമാണ് ഈ നീക്കം ലക്ഷ്യമിടുന്നത്.

ലോക്‌സഭയിലും സംസ്ഥാന അസംബ്ലികളിലും സ്ത്രീകള്‍ക്ക് മൂന്നിലൊന്ന് സീറ്റുകള്‍ സംവരണം ചെയ്യാനാണ് സർക്കാർ ഉദ്ദേശിക്കുന്നത്. 2027 ല്‍ രാജ്യവ്യാപകമായി ജനസംഖ്യാ സെൻസസ് നടത്തുമെന്നും ജാതി കണക്കെടുപ്പ് ആദ്യമായി ഇതിന്റെ ഭാഗമാകുമെന്നും കഴിഞ്ഞ ആഴ്ച കേന്ദ്രം പ്രഖ്യാപിച്ചിരുന്നു.

ലഡാക്ക്, ജമ്മു കശ്മീർ, ഹിമാചല്‍ പ്രദേശ്, ഉത്തരാഖണ്ഡ് എന്നിവയുള്‍പ്പെടെയുള്ള പ്രദേശങ്ങള്‍ 2026 ഒക്ടോബറിലും രാജ്യത്തിന്റെ മറ്റ് സംസ്ഥാനങ്ങളില്‍ 2027 ലും ആയിരിക്കും സെൻസസ് നടക്കുക.