സിപിഎം ബ്രാഞ്ച് സെക്രട്ടറിയുടെ ബൈക്ക് അജ്ഞാതര്‍ തീയിട്ട് നശിപ്പിച്ചു ; പിന്നിൽ കഞ്ചാവ് മാഫിയ എന്ന് സംശയം

സ്വന്തം ലേഖകൻ

തിരുവനന്തപുരം: സിപിഎം ബ്രാഞ്ച് സെക്രട്ടറിയുടെ ബൈക്ക് അജ്ഞാതര്‍ തീയിട്ട് നശിപ്പിച്ചു. തിരുവനന്തപുരം വിളപ്പിൽശാല ചൊവ്വള്ളൂര്‍ ബ്രാഞ്ച് സെക്രട്ടറി രഞ്ജിത്തിന്‍റെ ബൈക്കാണ് തീയിട്ട് നശിപ്പിച്ചത്.

ഇന്ന് പുലർച്ചെയാണ് സംഭവം. വീടിന് സമീപത്ത് നിര്‍ത്തിയിട്ടിരിക്കുകയായിരുന്നു ബൈക്ക്. ഇതിനിടയിലാണ് അജ്ഞാതൻ ബൈക്കിന് തീയിട്ടത്.

സമീപത്തെ സിസിടിവി ദൃശ്യങ്ങളിൽ പ്രതിയെന്ന് സംശയിക്കുന്ന യുവാവ് സ്കൂട്ടറിൽ പോകുന്ന ദൃശ്യങ്ങൾ പതിഞ്ഞിട്ടുണ്ട്. ഈ ദൃശ്യങ്ങളും പരിശോധിച്ചാണ് പോലീസ് അന്വേഷണം നടത്തുന്നത്.

പ്രദേശത്തെ കഞ്ചാവ് സംഘത്തിനെതിരെ രഞ്ജിത്ത് പ്രതികരിച്ചിട്ടുണ്ട്. ഇതിന്‍റെ വൈരാഗ്യമാകാം സംഭവത്തിന് പിന്നിലെന്നാണ് പോലീസ് സംശയിക്കുന്നത്.