കാഞ്ഞിരപ്പള്ളി: പാറത്തോട് ഗ്രേസി മെമ്മോറിയല് ഹൈസ്കൂളിന്റെ നേതൃത്വത്തില് വിദ്യാര്ഥിനിക്ക് വീടൊരുക്കി നല്കുന്നു.
സ്കൂളിലെ വിദ്യാര്ഥികളും അധ്യാപകരും രക്ഷിതാക്കളും സുമനസുകളും സ്കൂള് മാനേജ്മെന്റ് എസ്എന്ഡിപി കോരുത്തോട് 1493-ാം നമ്പര് ശാഖയും ചേര്ന്നാണ് നിർധനയായ വിദ്യാര്ഥിനിക്ക് വീട് നിര്മിച്ച് നൽകുന്നത്.
നിലവില് ഇവര് വാടക വീട്ടിലാണ് താമസിക്കുന്നത്. വിദ്യാർഥിനിയുടെ മാതാവ് വര്ഷങ്ങളായി കാന്സറിന് ചികിത്സയിലുമാണ്.
Whatsapp Group 1 | Whatsapp Group 2 |Telegram Group
പാലപ്രയില് നിര്മിക്കുന്ന വീടിന്റെ തറക്കല്ലിടീല് ഇന്നു രാവിലെ 9.30ന് സെബാസ്റ്റ്യന് കുളത്തുങ്കല് എംഎല്എ നടത്തും.
രണ്ടു മുറിയും ഹാളും അടുക്കളയും സിറ്റൗട്ടുമായി നിര്മിക്കുന്ന വീടിന് ഒൻപത് ലക്ഷത്തോളം രൂപയാണു ചെലവ് പ്രതീക്ഷിക്കുന്നത്. പൂര്വ വിദ്യാര്ഥികളും പദ്ധതിയുടെ ഭാഗമാകും.
എത്രയും വേഗം നിര്മാണം പൂര്ത്തിയാക്കി ജനുവരിയോടെ വീട് കൈമാറാനാണു ലക്ഷ്യമിടുന്നതെന്ന് സ്കൂള് അധികൃതര് പറഞ്ഞു.
പത്രസമ്മേളനത്തില് പ്രഥമാധ്യാപിക ലെറ്റി സി. തോമസ്, പിടിഎ പ്രസിഡന്റ് ടി.എ. സൈനില്ല, ജനറല് കണ്വീനര് ടോമി ജേക്കബ്, മാനേജിംഗ് വൈസ് പ്രസിഡന്റ് ഷാജി മങ്കുഴിയില്, സീനിയര് അസിസ്റ്റന്റ് ദീപ ഷാജി എന്നിവര് പങ്കെടുത്തു.
