തിരുവനന്തപുരം: യുഡിഎഫ് സർക്കാരിന്റെ ആദ്യ ബജറ്റിന്മേലുള്ള പൊതുചർച്ചയ്ക്ക് ഇന്ന് സംസ്ഥാന നിയമസഭയില് തുടക്കമാകും.
ബജറ്റിലെ വിവിധ നിർദ്ദേശങ്ങളെച്ചൊല്ലി ഭരണ-പ്രതിപക്ഷങ്ങള് തമ്മില് കനത്ത വാദപ്രതിവാദങ്ങള്ക്ക് സഭ വേദിയാകുമെന്നാണ് സൂചന. ധനമന്ത്രി അവതരിപ്പിച്ച ബജറ്റിലെ പ്രഖ്യാപനങ്ങളെ രാഷ്ട്രീയമായും ജനകീയമായും നേരിടാൻ പ്രതിപക്ഷം തന്ത്രങ്ങള് മെനഞ്ഞുകഴിഞ്ഞു.
വീര്യം കുറഞ്ഞ മദ്യത്തിന്റെ നികുതി കുറച്ച് വില്പന നടത്താനുള്ള ബജറ്റ് നിർദ്ദേശവും, ധാതു സംസ്കരണ മേഖലയില് സ്വകാര്യ പങ്കാളിത്തം അനുവദിക്കാനുള്ള തീരുമാനവുമായിരിക്കും പ്രതിപക്ഷം സഭയില് പ്രധാന ആയുധമാക്കുക.
Whatsapp Group 1 | Whatsapp Group 2 |Telegram Group
ഈ രണ്ട് വിഷയങ്ങളിലും സർക്കാരിനെ കടുത്ത പ്രതിരോധത്തിലാക്കാനാണ് പ്രതിപക്ഷത്തിന്റെ നീക്കം. പരിസ്ഥിതി നാശത്തിനും ലഹരിവ്യാപനത്തിനും ഈ തീരുമാനങ്ങള് കാരണമാകുമെന്ന് ചൂണ്ടിക്കാട്ടി സഭയ്ക്കകത്തും പുറത്തും ശക്തമായ പ്രതിഷേധം ഉയർത്താനാണ് അവർ ലക്ഷ്യമിടുന്നത്.
അതേസമയം, ഈ ബജറ്റ് നിർദ്ദേശങ്ങളില് ഭരണകക്ഷിയായ കോണ്ഗ്രസിനുള്ളില് തന്നെ ഭിന്നതയും പ്രതിഷേധവും കനക്കുകയാണെന്നാണ് റിപ്പോർട്ടുകള്. പാരമ്പര്യ നിലപാടുകളില് നിന്നുള്ള വ്യതിയാനം പാർട്ടിയുടെ പ്രതിച്ഛായയെ ബാധിക്കുമെന്ന ആശങ്ക ഒരുവിഭാഗം നേതാക്കള്ക്കുണ്ട്.
പാർട്ടിയിലും മുന്നണിയിലും വിവാദങ്ങള് പുകയുന്ന പശ്ചാത്തലത്തില്, എക്സൈസ് മന്ത്രി ഇന്ന് മുഖ്യമന്ത്രിയെ കണ്ട് നിലവിലെ സാഹചര്യങ്ങളും തുടർനടപടികളും ചർച്ച ചെയ്തേക്കുമെന്നാണ് വിവരം.
