ബാങ്ക് മാനേജരെ അടിച്ച വനിത എസ്പിയ്ക്കു നഷ്ടമായത് 18 ലക്ഷം: കേസ് ഒതുക്കാൻ ബാങ്ക് മാനേജർക്ക് എസ് പി നിഷാന്തിനി നൽകിയത് ലക്ഷങ്ങൾ; ഇടിയന്മാരായ പൊലീസുകാർക്ക് താക്കീതായി ഹൈക്കോടതിയുടെ ഇടപെടൽ
ക്രൈം ഡെസ്‌ക്
കൊച്ചി: ബാങ്ക് മാനേജരെ ഇടിച്ച് കേസിൽ കുടുങ്ങിയ വനിതാ ഐപിഎസ് ഉദ്യോഗസ്ഥയ്ക്കു നഷ്ടമായത് 18 ലക്ഷം രൂപ. അനാവശ്യമായി പ്രതികളെയും, വാദികളെയും ഭീഷണിപ്പെടുത്തുകയും സാധാരണക്കാരെ മർദിക്കുകയും ചെയ്യുന്ന ഗുണ്ടാ പൊലീസുകാർക്കുള്ള താക്കീതായാണ് ഇപ്പോൾ വിവരങ്ങൾ പുറത്തു വന്നിരിക്കുന്ന്. ഇത് അക്ഷരാർത്ഥത്തിൽ പൊലീസിനെ ഞെട്ടിക്കുന്നതാണ്. കൊച്ചിയിലെ പ്രമുഖ ബിസിനസുകാരൻ മുൻകൈയെടുത്താണ് ഒത്തുതീർപ്പ് ചർച്ചകൾ നടന്നത്.
യൂണിയൻ ബാങ്ക് ഒഫ് ഇന്ത്യയുടെ തൊടുപുഴ ബ്രാഞ്ച് മാനേജരായിരുന്ന പേഴ്‌സി ജോസഫ് ഡെസ്മണ്ടിനെ മർദിച്ച കേസിലാണ് തൊടുപുഴ മുൻ എ.എസ്.പി ആർ നിശാന്തിനിയ്‌ക്കെതിരെ ഹൈക്കോടതി നടപടിയെടുത്തത്. മർദനം കൂടാതെ പീഡനക്കേസിൽ കുടുക്കിയെന്നുമായിരുന്നു ഡെസ്മണ്ടിന്റെ പരാതി. നിഷാന്തിനിയ്‌ക്കെതിരെ ജോസഫ് ഡെസ്മണ്ട് നൽകിയ കേസാണ് ഇപ്പോൾ 18.5 ലക്ഷം രൂപ നൽകി ഒത്തുതീർപ്പാക്കിയത്. ഹൈക്കോടതി മീഡിയേഷൻ സെന്ററിൽ വച്ചാണ് പണം കൈമാറിയത്. ജൂലായ് 12നാണ് ഒത്തുതീർപ്പാക്കിയതെങ്കിലും ഇപ്പോഴാണ് ഇതുസംബന്ധിച്ച് റിപ്പോർട്ടുകൾ പുറത്തുവരുന്നത്.
Whatsapp Group 1 | Whatsapp Group 2 |Telegram Group
കേസിൽ തിരിച്ചടി നേരിടുമെന്ന് വ്യക്തമായതോടെയാണ് ഉന്നത പൊലീസ് ഉൾപ്പടെയുള്ളവർ ഒത്തുതീർപ്പിന് മുതിർന്നത്. കേസിൽ ആർ. നിശാന്തിനിക്കെതിരെ പേഴ്‌സി ജോസഫ് നൽകിയ മൊഴി പൊലീസ് നശിപ്പിക്കുകയും കേസ് അട്ടിമറിക്കാൻ ഉന്നതതല നീക്കം നടത്തുകയും ചെയ്തിരുന്നു. 2011 ജൂലായിലാണ് കേസിന് ആസ്പദമായ സംഭവം. അന്ന് സംഭവത്തിൽ എ.ഡി.ജി.പി മനോജ് എബ്രഹാമിനെ അന്വേഷണ ഉദ്യോഗസ്ഥനായി നിയമിച്ചിരുന്നു. നിശാന്തിനിക്കെതിരെ ഉന്നയിച്ച ആരോപണങ്ങൾക്ക് തെളിവില്ലെന്നാണ് മനോജ് എബ്രഹം റിപ്പോർട്ട് നൽകിയത്.
തൊടുപുഴ യൂണിയൻ ബാങ്കിൽ എത്തിയ തൊടുപുഴ സ്റ്റേഷനിലെ പൊലീസുകാരിയെ അപമാനിക്കാൻ ബാങ്ക് മാനേജർ പേഴ്‌സി ശ്രമിച്ചെന്നാരോപിച്ചാണു കേസെടുത്തത്. തുടർന്ന് നിശാന്തിനി, തന്നെ ഓഫിസിൽ വിളിച്ചുവരുത്തി മർദിച്ചെന്നാണു പേഴ്‌സിയുടെ ആരോപണം. ജൂലായ് 26നു വൈകിട്ട് പേഴ്‌സിയുടെ അറസ്റ്റ് രേഖപ്പെടുത്തി, രാത്രി മജിസ്‌ട്രേറ്റിനു മുൻപാകെ ഹാജരാക്കിയെങ്കിലും ജാമ്യത്തിൽ വിട്ടയച്ചു. തുടർന്ന് 3 ദിവസം കൊച്ചിയിലെ സ്വകാര്യ ആശുപത്രിയിൽ ചികിത്സയിലായിരുന്നു പേഴ്‌സി ജോസഫ്.
മാനഹാനിയുണ്ടാക്കുയും അന്യായമായി ഉപദ്രവിക്കുകയും ചെയ്ത സംഭവത്തിൽ ചെയ്ത സംഭവത്തിൽ 25 ലക്ഷം രൂപ നഷ്ടപരിഹാരം ആവശ്യപ്പെട്ട് 18 പേരെ പ്രതികളാക്കി പേഴ്‌സി തൊടുപുഴ കോടതിയിൽ 2017ൽ സ്വകാര്യ അന്യായം ഫയൽ ചെയ്തു. ഈ കേസിൽ വിധി വരുന്നതിനു തൊട്ടു മുൻപാണ് ഒത്തുതീർപ്പിനു തയ്യാറായത്. ഹൈക്കോടതി നിർദേശിച്ച മീഡിയേറ്ററുടെ സാന്നിധ്യത്തിൽ 18.5 ലക്ഷം രൂപ പേഴ്‌സി ജോസഫിനു കൈമാറി. ഇതോടൊപ്പം നിശാന്തിനി പേഴ്‌സിയോടു മാപ്പു പറഞ്ഞു. കേസ് ഒത്തുതീർപ്പാക്കിയതു സംബന്ധിച്ചു ഹൈക്കോടതിയുടെ റിപ്പോർട്ട് തൊടുപുഴ കോടതിയിൽ സമർപ്പിച്ച ശേഷം പേഴ്‌സി ജോസഫ് കേസ് പിൻവലിക്കുന്നതായി അറിയിച്ചു.
