കടുത്തുരുത്തി പാലാക്കരയിൽ പൊലീസ് ജീപ്പും, ചരക്ക് ലോറിയും കൂട്ടിയിടിച്ചു; അപകടത്തിൽപ്പെട്ടത് കുറവിലങ്ങാട് സി.ഐ. സഞ്ചരിച്ചിരുന്ന ജീപ്പ് ; മൂന്നു പോലീസ്കാർക്ക് സാരമായ പരിക്ക്

സ്വന്തം ലേഖകൻ

കടുത്തുരുത്തി: കടുത്തുരുത്തി പാലാക്കരയിൽ പൊലീസ് ജീപ്പും, ചരക്ക് ലോറിയും കൂട്ടിയിടിച്ചു. കുറവിലങ്ങാട് സി.ഐ. സഞ്ചരിച്ചിരുന്ന വാഹനമാണ് അപകടത്തിൽ പെട്ടത്. കുറവിലങ്ങാട് സിഐ പി.എസ് സംസൺ, എസ് ഐ ടി.ആർ ദീപു, എ എസ് ഐ ഷിനോയ് തോമസ് എന്നിവർക്ക് സാരമായ പരിക്കേറ്റു.

രാവിലെ പതിനൊന്നരയോട്കൂടിയാണ് നാടിനെ നടുക്കിയ സംഭവം. വളവുകൾ ഉള്ള വഴിയിൽ അമിതവേഗത്തിൽ വരികയായിരുന്നു ചരക്ക് ലോറി. ഈ സമയത്ത് എതിർദിശയിൽ വരികയായിരുന്ന പൊലീസ് ജീപ്പ് ലോറിയുമായി കൂട്ടിയിടിച്ചു. ഇടിയുടെ ആഘാതത്തിൽ ജീപ്പിന്റെ മുൻവശം പൂർണമായും തകർന്നു.

നാട്ടുകാർ ഉൾപ്പെടെ അപകടസ്ഥലത്തേക്ക് പാഞ്ഞെത്തി രക്ഷാപ്രവർത്തനം നടത്തി. പരിക്കേറ്റ പൊലീസ് ഉദ്യോഗസ്ഥരെ ഉൾപ്പെടെ മുട്ടുചിറയിലെ സ്വകാര്യ ആശുപത്രിയിൽ പ്രവേശിപ്പിച്ചു.

വൈക്കം ഡി.വൈ.എസ്.പി. ഓഫീസിൽ നടക്കുന്ന യോഗത്തിൽ പങ്കെടുക്കാൻ സിഐ പി.എസ് സംസണും സംഘവും പോകുന്നതിനിടെയാണ് അപകടം സംഭവിച്ചത്.