എംസി റോഡിൽ തെള്ളകത്തെ വാഹനാപകടം: ബൈക്ക് കുറുകെ ചാടി എന്ന വാദം തെറ്റെന്ന് പോലീസ്; അപകടത്തിന്റെ സിസിടിവി ദൃശ്യങ്ങൾ തേർഡ് ഐ ന്യൂസ് ലൈവിന്

സ്വന്തം ലേഖകൻ

കോട്ടയം: എംസി റോഡിൽ തെള്ളകത്ത് കാർ നിയന്ത്രണം വിട്ട് മറിഞ്ഞതിന് പിന്നിലെ കാരണം അജ്ഞാതമായി തുടരുന്നു. ബൈക്ക് കുറുകെ ചാടിയതിനെ തുടർന്ന് , രക്ഷിക്കാനുള്ള ശ്രമത്തിനിടെയാണ് കാർ മറിഞ്ഞതെന്നായിരുന്നു രാവിലെ പുറത്ത് വന്ന വാദങ്ങൾ.

എന്നാൽ , കാർ മറിഞ്ഞതിൻ്റെ സി സി ടി വി ദൃശ്യങ്ങളിൽ ഒരിടത്ത് പോലും ബൈക്കിൻ്റെ ചിത്രമില്ല. ഈ സാഹചര്യത്തിലാണ് ബൈക്ക് കുറുകെ ചാടി എന്ന ഡ്രൈവറുടെ വാദം പൊളിയുന്നത്. അപകടത്തിന്റെ സിസിടിവി ക്യാമറാ ദൃശ്യം തേർഡ് ഐ ന്യൂസ് ലൈവിന് ലഭിച്ചു. തെള്ളകത്ത് എം.സി റോഡിൽ പെട്രോൾ പമ്പിന് മുന്നിലായിരുന്നു അപകടം. പമ്പിലെ സിസിടിവി ക്യാമറാ ദൃശ്യങ്ങളാണ് ഇപ്പോൾ പുറത്ത് വന്നത്.

വെള്ളിയാഴ്ച രാവിലെ 8.08 നാണ് അപകടം ഉണ്ടായതെന്ന് സി സി ടി വി ക്യാമറകളിൽ നിന്ന് വ്യക്തമാണ്. റോഡിന്റെ ഇടത് വശത്ത് കൂടി വരുന്ന വാഹനം , ഇടത് വശത്ത് എന്തിലോ ഇടിച്ച ശേഷം വലത്തേയ്ക്ക് അതിവേഗം വെട്ടിത്തിരിഞ്ഞ് , റോഡരികിലെ കുഴിയിലേയ്ക്ക് മറിയുന്നത് ദൃശ്യങ്ങളിൽ വ്യക്തമാണ്. എന്നാൽ , ഇതിൽ ഒരിടത്ത് പോലും ബൈക്ക് കുറുകെ ചാടിയത് കണ്ടെത്താൻ സാധിച്ചിട്ടില്ല.

ഈ സാഹചര്യത്തിൽ അപകടത്തിന് പിന്നിലെ അദൃശ്യകരം എന്താണ് എന്ന് കണ്ടെത്താൻ പൊലീസ് അന്വേഷണം ആരംഭിച്ചിട്ടുണ്ട്. അപകടത്തിൽ നാലുപേർക്ക് പരിക്കേറ്റിരുന്നു.