കുട്ടികൾ ഉൾപ്പെടുന്ന ലൈംഗീക ദൃശ്യങ്ങൾ സൂക്ഷിക്കുകയോ പ്രചരിപ്പിക്കുകയോ ചെയ്താൽ പുറംലോകം കാണില്ല

സ്വന്തം ലേഖിക

തിരുവനന്തപുരം: കുട്ടികൾ ഉൾപ്പെടുന്ന ലൈംഗിക ദൃശ്യങ്ങൾ പങ്കുവയ്ക്കുകയോ, സൂക്ഷിക്കുകയോ ചെയ്യുന്നവരെ കാത്തിരിക്കുന്നത് വലിയ ശിക്ഷയാണ്.പോക്‌സോ നിയമ ഭേദഗതി അനുസരിച്ച് കുട്ടികൾ ഉൾപ്പെടുന്ന ലൈംഗീക ദ്യശ്യങ്ങൾ പ്രചരിപ്പിക്കുന്നവർക്ക് കുറഞ്ഞത് 5 വർഷം തടവും 10 ലക്ഷം രൂപ പിഴയും ലഭിക്കാം.ലൈംഗീക ചിത്രീകരിക്കുന്നതിന്റെ ഭാഗമായുള്ള പീഡനത്തിന് കുറഞ്ഞത് 20 വർഷം തടവു മുതൽ വധശിക്ഷവരെ ലഭിക്കാം.

ഇന്റർനെറ്റിലൂടെ ഇത്തരം ചിത്രങ്ങളോ വീഡിയോകളോ കാണുകയോ ഡൗൺലോഡ് ചെയ്യുകയോ സോഷ്യൽ മീഡിയകളിലൂടെ പ്രചരിപ്പിക്കുകയോ ചെയ്യുന്നതും കുറ്റകരമാണ്.വാട്‌സ്ആപ്പ്, ടെലിഗ്രാം ഗ്രൂപ്പുകളിൽ ഇത്തരം വീഡിയോ പ്രത്യക്ഷപ്പെട്ടാലും അംഗങ്ങൾക്കെതിരെയും അന്വേഷണമുണ്ടാകും.

മറ്റൊരാൾ അശ്ലീല വീഡിയോ അയച്ചു തരുന്നത് അധികൃതരെ അറിയിക്കുന്നില്ലെങ്കിൽ അവർക്കെതിരെയും നടപടി ഉണ്ടാകും.

അടുത്തിടെ കുട്ടികളുടെ അശ്ലീല ചിത്രങ്ങൾ പ്രചരിപ്പിച്ചതിനും പകർത്തി സൂക്ഷിച്ചതിനും ഓപ്പറേഷൻ പി ഹണ്ടിന്റെ ഭാഗമായി 12 പേരെയാണ് അറസ്റ്റ് ചെയ്തത്.

ഇന്റർപോളിന്റെ സഹായത്തോടെ കേരള പോലീസ് നടത്തിയ അന്വേഷണത്തിലാണ് ഇവർ പിടിയിലായത്.ഇതോടെ ടെലിഗ്രാമിൽ പ്രവർത്തിച്ചിരുന്ന മൂന്നു പോൺ ഗ്രൂപ്പുകളിൽ കുട്ടികളുടെ അശ്ലീല വീഡിയോകൾ പ്രചരിക്കുന്നതായും കണ്ടെത്തി.