ഉത്തരാഖണ്ഡ്: ഉത്തരാഖണ്ഡിലെ ഡെറാഡൂണ് ജില്ലയില് കുടിവെള്ള വിതരണത്തെച്ചൊല്ലി രണ്ട് സമുദായങ്ങള് തമ്മിലുണ്ടായ വൻ സംഘർഷത്തില് ഒരാള് കൊല്ലപ്പെട്ടു. ആക്രമണത്തില് മൂന്ന് പേർക്ക് ഗുരുതരമായി പരിക്കേറ്റിട്ടുണ്ട്.
ഡെറാഡൂണിലെ സഹാസ്പൂർ പോലീസ് സ്റ്റേഷൻ പരിധിയിലുള്ള ബൈരാഗിവാല എന്ന ഗ്രാമത്തിലാണ് നാടിനെ നടുക്കിയ സംഭവം.
ശനിയാഴ്ച വൈകിട്ടോടെയാണ് പ്രദേശത്ത് കുടിവെള്ളത്തെച്ചൊല്ലിയുള്ള തർക്കം വൻ സംഘർഷമായി മാറിയത്. വാക്കേറ്റത്തിനൊടുവില് ഒരു വിഭാഗം ആളുകള് മറുവിഭാഗത്തിനു നേരെ മാരകായുധങ്ങളുമായി ക്രൂരമായ ആക്രമണം അഴിച്ചുവിടുകയായിരുന്നു.
Whatsapp Group 1 | Whatsapp Group 2 |Telegram Group
ആക്രമണത്തില് പരിക്കേറ്റ നാല് പേരെയും ഉടൻ തന്നെ അത്യാസന്ന നിലയില് സമീപത്തെ ആശുപത്രിയില് പ്രവേശിപ്പിച്ചെങ്കിലും, ചികിത്സയിലിരിക്കെ ഒരാള് മരണത്തിന് കീഴടങ്ങുകയായിരുന്നു. പരിക്കേറ്റ മറ്റ് മൂന്ന് പേർ നിലവില് തീവ്രപരിചരണ വിഭാഗത്തില് ചികിത്സയിലാണ്.
കൊലപാതക വാർത്ത പുറത്തുവന്നതോടെ ഗ്രാമത്തില് വീണ്ടും സംഘർഷാവസ്ഥ മൂർച്ഛിച്ചിരിക്കുകയാണ്. കൂടുതല് അനിഷ്ട സംഭവങ്ങള് ഒഴിവാക്കാനും ക്രമസമാധാന നില പൂർണ്ണമായി വീണ്ടെടുക്കാനുമായി പ്രദേശത്ത് വൻ പോലീസ് സന്നാഹത്തെയാണ് നിലവില് വിന്യസിച്ചിരിക്കുന്നത്.
അക്രമം നടത്തിയ ശേഷം ഒളിവില് പോയ പ്രതികളെ കണ്ടെത്താനായി പോലീസ് പ്രദേശത്ത് വ്യാപകമായ തെരച്ചില് ആരംഭിച്ചതായി അഡീഷണല് എസ്പി അറിയിച്ചു. കുറ്റക്കാർക്കെതിരെ ശക്തമായ നിയമനടപടികള് സ്വീകരിക്കുമെന്നും സംഭവത്തില് വിശദമായ ഉന്നതതല അന്വേഷണം പുരോഗമിക്കുകയാണെന്നും പോലീസ് വ്യക്തമാക്കി.
