ഇന്ത്യയിലെ ആധാർ സേവനങ്ങളില് വലിയ മാറ്റത്തിന് തുടക്കമിട്ട് പഴയ എംആധാർ (mAadhaar) ആപ്പ് ഉടൻ അവസാനിപ്പിക്കുമെന്ന് പ്രഖ്യാപിച്ച് കേന്ദ്ര സർക്കാർ.
ഇതിന് പകരമായി കൂടുതല് സുരക്ഷയും ആധുനിക സൗകര്യങ്ങളും ഉള്ക്കൊള്ളുന്ന പുതിയ ആധാർ ആപ്പ് അവതരിപ്പിച്ചിരിക്കുകയാണ്. രാജ്യത്തെ ഡിജിറ്റല് തിരിച്ചറിയല് സംവിധാനത്തെ കൂടുതല് സുരക്ഷിതവും ഉപയോക്തൃ സൗഹൃദവുമാക്കുക എന്ന ലക്ഷ്യത്തോടെയാണ് ഈ മാറ്റമെന്ന് യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) അറിയിച്ചു.
എംആധാർ ഉടൻ അവസാനിപ്പിക്കുമെന്ന് അറിയിപ്പ്
Whatsapp Group 1 | Whatsapp Group 2 |Telegram Group
സമൂഹ മാധ്യമമായ എക്സില് പങ്കുവെച്ച ഔദ്യോഗിക അറിയിപ്പില് എംആധാർ ഉടൻ അവസാനിക്കുമെന്ന് യുഐഡിഎഐ അറിയിച്ചു. പുതിയ ആധാർ ആപ്പ് ഡൗണ്ലോഡ് ചെയ്ത് കൂടുതല് വേഗത്തിലുള്ള സേവനങ്ങളും സ്മാർട്ട് ഫീച്ചറുകളും അനുഭവിക്കൂ എന്ന് യുഐഡിഎഐ വ്യക്തമാക്കിയിട്ടുണ്ട്. പഴയ ആപ്പിന്റെ ഒരു സാധാരണ പുതുക്കല് മാത്രമല്ല പുതിയ പ്ലാറ്റ്ഫോം. ആധാർ വിവരങ്ങള് പങ്കിടുന്ന രീതിയിലും തിരിച്ചറിയല് പരിശോധനയിലും വലിയ മാറ്റങ്ങളാണ് ഇതിലൂടെ വരുന്നത്.
പുതിയ ആപ്പിലെ പ്രധാന സവിശേഷതയാണ് സുരക്ഷിതമായ ക്യുആർ കോഡ് അടിസ്ഥാനമാക്കിയുള്ള ആധാർ ഷെയറിംഗ് സംവിധാനം. ഹോട്ടലുകള്, ആശുപത്രികള്, സർക്കാർ ഓഫീസുകള് തുടങ്ങിയ ഇടങ്ങളില് ഇനി മുഴുവൻ ആധാർ വിവരങ്ങളും കാണിക്കേണ്ടതില്ല. ആവശ്യമായ വിവരങ്ങള് മാത്രം ക്യുആർ കോഡ് വഴി സുരക്ഷിതമായി പങ്കിടാൻ കഴിയുമെന്ന് അധികൃതർ അറിയിച്ചു.
പുത്തന് ആധാര് ആപ്പില് ശക്തമായ ഫീച്ചറുകള്
അതേസമയം, ആധാർ ഓതന്റിക്കേഷൻ സംവിധാനവും ശക്തിപ്പെടുത്തിയിട്ടുണ്ട്. മുമ്പ് ഒടിപി അടിസ്ഥാനമാക്കിയ പരിശോധന മാത്രമായിരുന്നു പ്രധാനമായും ഉപയോഗിച്ചിരുന്നത്. ഇനി ഒടിപിയ്ക്ക് പുറമെ ഫേസ് ഓതന്റിക്കേഷനും ക്യുആർ പരിശോധനയും ഉള്പ്പെടുന്ന മള്ട്ടി-ലെയർ സുരക്ഷാ സംവിധാനം വരുന്നു. ഇതിലൂടെ വ്യാജ ഉപയോഗവും ഡാറ്റ ചോർച്ചയും കുറയ്ക്കാനാകുമെന്ന് യുഐഡിഎഐ അവകാശപ്പെടുന്നു. ഉപയോക്താക്കള്ക്ക് സ്വന്തം ബയോമെട്രിക് വിവരങ്ങളില് കൂടുതല് നിയന്ത്രണവും ലഭിക്കും. വിരലടയാളം, മുഖം, ഐറിസ് തുടങ്ങിയ വിവരങ്ങള് നേരിട്ട് ആപ്പില് നിന്ന് ലോക്ക് ചെയ്യാനും നിയന്ത്രിക്കാനും സാധിക്കും. പൊതുസ്ഥലങ്ങളിലോ മറ്റുള്ളവരുടെ ഉപകരണങ്ങളിലോ ആധാർ ഉപയോഗിക്കുമ്പോള് ഇത് കൂടുതല് സുരക്ഷ നല്കും.
പുതിയ ആപ്പ് ഉപയോഗിക്കാൻ ആദ്യം ഔദ്യോഗിക ആധാർ ആപ്പ് ഗൂഗിള് പ്ലേ സ്റ്റോർ അല്ലെങ്കില് ആപ്പിള് ആപ്പ് സ്റ്റോർ വഴി ഡൗണ്ലോഡ് ചെയ്യണം. തുടർന്ന് ആധാറുമായി ബന്ധിപ്പിച്ച മൊബൈല് നമ്പർ നല്കി ഒടിപി പരിശോധന പൂർത്തിയാക്കണം. ചിലർക്കു ഫേസ് ഓതന്റിക്കേഷനും നിർബന്ധമായേക്കാം. പിന്നീട് പിൻ നമ്പർ സജ്ജമാക്കി ആധാർ നമ്പർ ചേർത്ത് രജിസ്ട്രേഷൻ പൂർത്തിയാക്കാം. ഇതോടൊപ്പം, മൈ ആധാർ പോർട്ടല് വഴി സൗജന്യമായി ആധാർ രേഖകള് പുതുക്കാനുള്ള അവസരം 2027 ജൂണ് 14 വരെ സർക്കാർ ദീർഘിപ്പിച്ചിട്ടുണ്ട്.
