കോയമ്പത്തൂർ: തമിഴ്നാട് വാല്പ്പാറയിലുണ്ടായ വാഹനാപകടത്തില് പരിക്കേറ്റ് കോയമ്പത്തൂർ മെഡിക്കല് കോളേജ് ആശുപത്രിയില് ചികിത്സയിലായിരുന്ന നൗഷാദ് അലി അന്തരിച്ചു.
ഇന്ന് പുലർച്ചെയായിരുന്നു മരണം. നൗഷാദ് അലിയുടെ ആരോഗ്യനില വഷളായിട്ടും ഡോക്ടർമാർ എത്താൻ വൈകിയതാണ് മരണം സംഭവിക്കാൻ കാരണമെന്ന് കുടുംബം ആരോപിച്ചു. തീവ്രപരിചരണ വിഭാഗത്തില് ചികിത്സയിലിരിക്കെയാണ് മരണം.
അപകടത്തില് പരിക്കേറ്റ മറ്റു മൂന്ന് പേർ ഇപ്പോഴും ചികിത്സയില് തുടരുകയാണ്. കോയമ്പത്തൂർ മെഡിക്കല് കോളേജിലുള്ള മുഹമ്മദ് ഫായിസിന്റെ ആരോഗ്യനില ഇപ്പോഴും അതീവ ഗുരുതരമായി തുടരുന്നു. ഇദ്ദേഹം തീവ്രപരിചരണ വിഭാഗത്തില് നിരീക്ഷണത്തിലാണ്.
Whatsapp Group 1 | Whatsapp Group 2 |Telegram Group
അതേസമയം, കോയമ്പത്തൂരില് തന്നെയുള്ള സഹദിൻ മുഹമ്മദിന്റെ നിലയില് നേരിയ പുരോഗതിയുള്ളതിനാല് വാർഡിലേക്ക് മാറ്റിയിട്ടുണ്ട്. പെരിന്തല്മണ്ണയിലെ സ്വകാര്യ ആശുപത്രിയില് ചികിത്സയിലുള്ള മസ്നിന്റെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. ഇദ്ദേഹത്തെയും വാർഡിലേക്ക് മാറ്റിയിട്ടുണ്ട്.
കഴിഞ്ഞ ദിവസമാണ് മലയാളി യുവാക്കള് സഞ്ചരിച്ചിരുന്ന വാഹനം വാല്പ്പാറയില് അപകടത്തില്പ്പെട്ടത്. നൗഷാദ് അലിയുടെ വിയോഗത്തോടെ അപകടത്തില് മരിച്ചവരുടെ എണ്ണം വർധിച്ചു.
