നമ്മളില് പലര്ക്കും ചായയ്ക്കൊപ്പം രണ്ട് ബിസ്ക്കറ്റ് കഴിക്കുന്നത് ഒഴിവാക്കാനാവാത്ത ഒന്നാണ്. എന്നാല്, കേക്കുകളോ മറ്റ് മധുരപലഹാരങ്ങളോ കഴിക്കുന്നതിനേക്കാള് ദോഷകരമായി ഈ കൊച്ചു ശീലം നമ്മുടെ മെറ്റബോളിക് ആരോഗ്യത്തെ ബാധിക്കുമെന്ന് ആരോഗ്യ വിദഗ്ധര് മുന്നറിയിപ്പ് നല്കുന്നു.
രക്തത്തിലെ പഞ്ചസാരയുടെ അളവ് പെട്ടെന്ന് വര്ധിപ്പിക്കാനും ‘ഇന്സുലിന് റെസിസ്റ്റന്സ്’ (Insulin Resistance) എന്ന അവസ്ഥയിലേക്ക് നയിക്കാനും ഇത്തരം ലഘുഭക്ഷണങ്ങള് കാരണമാകുന്നു.
മിക്ക ബിസ്ക്കറ്റുകളും നിര്മ്മിച്ചിരിക്കുന്നത് മൈദ, പഞ്ചസാര, ശുദ്ധീകരിച്ച സസ്യ എണ്ണകള് എന്നിവ ഉപയോഗിച്ചാണ്. ഇവയില് നാരുകളോ പ്രോട്ടീനോ തീരെ കുറവായതിനാല് കഴിച്ചയുടന് രക്തത്തിലെ ഗ്ലൂക്കോസ് നില കുത്തനെ ഉയരുന്നു.
Whatsapp Group 1 | Whatsapp Group 2 |Telegram Group
ഇത് പാന്ക്രിയാസിനെ അമിതമായി ഇന്സുലിന് ഉത്പാദിപ്പിക്കാന് നിര്ബന്ധിതമാക്കുന്നു. ഈ പ്രക്രിയ പതിവാകുന്നത് ശരീരഭാരം വര്ധിക്കാനും വിട്ടുമാറാത്ത ക്ഷീണം ബ്രെയിന് ഫോഗ് (Brain Fog) എന്നിവയ്ക്കും കാരണമാകും. കാലക്രമേണ ഇത് ടൈപ്പ് 2 പ്രമേഹത്തിലേക്കുള്ള വഴിതുറക്കുകയും ചെയ്യുന്നു.
ബിസ്ക്കറ്റുകളിലെ ഉപ്പും പഞ്ചസാരയും കൊഴുപ്പും ചേര്ന്ന സവിശേഷ മിശ്രിതം തലച്ചോറിലെ ഡോപമിന് ഉത്തേജിപ്പിക്കുന്നതിനാല് ഒന്നില് നിര്ത്താന് നമുക്ക് പ്രയാസമായിരിക്കും. ഇത് കൂടുതല് കഴിക്കാനുള്ള പ്രേരണയുണ്ടാക്കുന്നു.
ഈ അപകടകരമായ പാറ്റേണ് ഒഴിവാക്കാന് ബിസ്ക്കറ്റുകള്ക്ക് പകരം ബദാം, പുഴുങ്ങിയ മുട്ട, തൈര് അല്ലെങ്കില് പഴങ്ങള് പോലുള്ള പ്രോട്ടീന് അടങ്ങിയ ലഘുഭക്ഷണങ്ങള് ശീലമാക്കാവുന്നതാണ്. കുറഞ്ഞത് നാലാഴ്ചയെങ്കിലും ഈ മാറ്റം പരീക്ഷിച്ചാല് ശരീരത്തിന്റെ ഊര്ജ്ജനിലയിലും ദഹനത്തിലും വലിയ പുരോഗതി അനുഭവപ്പെടുമെന്ന് വിദഗ്ധര് ചൂണ്ടിക്കാട്ടുന്നു.
