കോട്ടയം: വീടുകളില് പലപ്പോഴും അത്താഴത്തിനോ പ്രഭാതഭക്ഷണത്തിനോ ഉണ്ടാക്കിയ ചപ്പാത്തികള് ബാക്കി വരാറുണ്ട്.
തണുത്തുപോയ ചപ്പാത്തികള് വീണ്ടും ചൂടാക്കി കഴിക്കാൻ പലർക്കും താല്പര്യമില്ലാത്തതിനാല് അവ പാഴാകുന്നതാണ് സാധാരം. എന്നാല് കുറച്ച് പോഷകസമൃദ്ധമായ ചേരുവകള് ചേർത്താല് ഈ ബാക്കിയുള്ള ചപ്പാത്തിയെ വളരെ എളുപ്പത്തില് ഒരു പുതിയ രുചികരമായ വിഭവമായി മാറ്റാം. വെറും പത്ത് മിനിറ്റിനുള്ളില് തയ്യാറാക്കാവുന്നതും കുട്ടികളും മുതിർന്നവരും ഒരുപോലെ ഇഷ്ടപ്പെടുന്നതുമായ ഒരു വിഭവമാണ് ഹെല്ത്തി ചപ്പാത്തി സ്ക്രാംബിള്.
ചേരുവകള്
Whatsapp Group 1 | Whatsapp Group 2 |Telegram Group
ചപ്പാത്തി – 4 എണ്ണം (ചെറിയ കഷ്ണങ്ങളാക്കി മുറിച്ചത്)
മുട്ട – 2 എണ്ണം
സവാള – 1 എണ്ണം (അരിഞ്ഞത്)
തക്കാളി – കാല് ഭാഗം (അരിഞ്ഞത്)
തേങ്ങ ചിരകിയത് – 2 ടേബിള് സ്പൂണ്
വെളിച്ചെണ്ണ – ആവശ്യത്തിന്
മഞ്ഞള്പ്പൊടി – 1/4 ടീസ്പൂണ്
കുരുമുളക് പൊടി – 1 ടീസ്പൂണ്
ഗരം മസാല – 1/4 ടീസ്പൂണ്
അറബിക് മസാല – 1/4 ടീസ്പൂണ്
കറിവേപ്പില – ആവശ്യത്തിന്
ഉപ്പ് – ആവശ്യത്തിന്
വെള്ളം – 2 ടേബിള് സ്പൂണ്
തയ്യാറാക്കുന്ന വിധം
ആദ്യമായി ബാക്കി വന്ന ചപ്പാത്തികള് കൈകൊണ്ടോ കത്രിക ഉപയോഗിച്ചോ ചെറിയ കഷ്ണങ്ങളായി മുറിച്ച് മാറ്റിവയ്ക്കുക. ശേഷം ഒരു പാൻ അടുപ്പത്ത് വെച്ച് ആവശ്യത്തിന് വെളിച്ചെണ്ണ ഒഴിച്ച് ചൂടാക്കുക. എണ്ണ ചൂടായാല് അതിലേക്ക് സവാള, തക്കാളി, കറിവേപ്പില എന്നിവ ചേർത്ത് നന്നായി വഴറ്റണം. സവാള പകുതി വഴന്നു വരുമ്പോള് മഞ്ഞള്പ്പൊടി, കുരുമുളക് പൊടി, ഗരം മസാല, അറബിക് മസാല എന്നിവ ചേർത്ത് പച്ചമണം മാറുന്നത് വരെ ഇളക്കുക. അറബിക് മസാല ഈ വിഭവത്തിന് പ്രത്യേകമായ രുചിയും സുഗന്ധവും നല്കുന്നു. ഇതിന് ശേഷം അല്പം ഉപ്പും രണ്ട് ടേബിള് സ്പൂണ് വെള്ളവും ചേർത്ത് മസാല നന്നായി ഇളക്കുക. ഇനി മുറിച്ചുവെച്ച ചപ്പാത്തി കഷ്ണങ്ങള് ചേർത്ത് മസാലയുമായി നന്നായി യോജിപ്പിക്കണം. മറ്റൊരു പാത്രത്തില് മുട്ടകള് അല്പം ഉപ്പും കുരുമുളകും ചേർത്ത് നന്നായി അടിച്ചെടുക്കുക. ഈ മുട്ടമിശ്രിതം പാനിലുള്ള ചപ്പാത്തിയുടെ മുകളിലൂടെ ഒഴിച്ച് നന്നായി ഇളക്കുക. മുട്ട വെന്തു വരുമ്പോള് ചിരകിയ തേങ്ങ മുകളില് വിതറി കുറച്ച് സമയം കൂടി ഇളക്കി തീ അണയ്ക്കാം.
ബാക്കി വരുന്ന ചപ്പാത്തി പാഴാക്കാതെ വളരെ എളുപ്പത്തില് ഒരു പുതിയതും പോഷകസമൃദ്ധവുമായ വിഭവമായി മാറ്റാൻ സഹായിക്കുന്നതാണ് ഈ ഹെല്ത്തി ചപ്പാത്തി സ്ക്രാംബിള്. സമയം കുറവുള്ള ദിവസങ്ങളിലും കുട്ടികള്ക്ക് വ്യത്യസ്തമായൊരു രുചി നല്കാനും ഈ റെസിപ്പി മികച്ച തിരഞ്ഞെടുപ്പാണ്. വീടുകളില് ലഭ്യമായ സാധാരണ ചേരുവകള് ഉപയോഗിച്ച് തയ്യാറാക്കാവുന്ന ഈ വിഭവം ഒരിക്കല് പരീക്ഷിച്ചുനോക്കൂ.
