ന്യൂഡൽഹി: ഡൽഹിയിൽ വായുമലിനീകരണം രൂക്ഷം. ദീപാവലി ആഘോഷങ്ങള്‍ക്ക് പിന്നാലെ മലിനീകരണത്തിൻ്റെ തോത് ഉയർന്നേക്കുമെന്നാണ് റിപ്പോർട്ടുകള്‍.
ഹരിത പടക്കങ്ങള്‍ക്ക് അനുമതി നല്‍കിയെങ്കിലും പടക്കങ്ങളുടെ അമിത ഉപയോഗവും നിരോധിത പടക്കങ്ങളുടെ രഹസ്യ വില്‍പ്പനയും വായു മലിനീകരണം ഉയരാൻ കാരണമാകുന്നതാണ്.
മയൂർ വിഹാർ, ആനന്ദ് വിഹാർ എന്നീ മേഖലകളില്‍ 300നു മുകളിലാണ് വായു ഗുണനിലവാര സൂചിക ഇന്നലെ രേഖപ്പെടുത്തിയത്. ദീപാവലിക്ക് പിന്നാലെ വായുഗുണനിലവാര സൂചിക ഏറ്റവും മോശം സ്ഥിതിയില്‍ എത്തിയാല്‍ കൃത്രിമ മഴ പെയ്യിപ്പിക്കാനുള്ള നീക്കത്തിലാണ് ഡൽഹി സർക്കാർ.
Whatsapp Group 1 | Whatsapp Group 2 |Telegram Group
അതേസമയം, ദീപാവലി പ്രമാണിച്ച്‌ ഏതാനും ദിവസങ്ങളായി വ്യാപാര സ്ഥാപനങ്ങളിലും തെരുവുകച്ചവട കേന്ദ്രങ്ങളിലുമെല്ലാം വലിയ തിരക്കാണ് അനുഭവപ്പെടുന്നത്. പടക്കം പൊട്ടിക്കുന്നതിനൊപ്പം തന്നെ കൂടുതല്‍ വാഹനങ്ങള്‍ റോഡിലിറങ്ങുന്നത് വായു മലിനീകരണം വർദ്ധിക്കുന്നതിന് ഇടയാക്കിയിട്ടുണ്ട്.
പടക്കം പൊട്ടിക്കുന്നതിന് സുപ്രീംകോടതി സമയക്രമം നിർദ്ദേശിച്ചിട്ടുണ്ടെങ്കിലും അതെല്ലാം മറികടന്നുള്ള ആഘോഷമാണ് ഇപ്പോള്‍ ഡൽഹിയില്‍ നടക്കുന്നത്. ഇതാണ് വായു മലിനീകരണം രൂക്ഷമാകാൻ കാരണമെന്നാണ് വിലയിരുത്തല്‍.
