ഇടുക്കി വട്ടക്കണ്ണിപ്പാറയില്‍ വിനോദസഞ്ചാരികളുമായെത്തിയ മിനി ടൂറിസ്റ്റ് ബസ് അപകടത്തില്‍പ്പെട്ടു; ബസ് പോസ്റ്റിലിടിച്ച് കുഴിയിലേക്ക് മറിഞ്ഞു; അഞ്ച് കുട്ടികളുള്‍പ്പെടെ 19 പേര്‍ക്ക് പരിക്ക്

ഇടുക്കി: ഇടുക്കി രാജാക്കാട് മിനി ടൂറിസ്റ്റ് നിയന്ത്രണം വിട്ട് പോസ്റ്റിലിടിച്ച് മറിഞ്ഞ് അപകടം.അപകടത്തിൽ 19 പേർക്ക് പരിക്ക്. പരിക്കേറ്റവരിൽ 5 പേർ കുട്ടികളാണ്. നിയന്ത്രണം വിട്ട ബസ് പോസ്റ്റിലിടിച്ച് മറിയുകയായിരുന്നു. തമിഴ്നാട്ടിൽ നിന്നുള്ള ബസാണ് അപകടത്തിൽപെട്ടത്.

വൈകിട്ട് നാലേമുക്കാലോടെയാണ് അപകടം. വട്ടക്കണ്ണിപ്പാറ എന്ന സ്ഥലത്ത് വെച്ചാണ് അപകടമുണ്ടായത്. പോസ്റ്റിലിടിച്ച ബസ് റോഡിന് സമീപത്തുള്ള കുഴിയിലേക്ക് മറിയുകയായിരുന്നു. ചെന്നൈയിൽ‌ നിന്നുള്ള വിനോദസഞ്ചാരികളാണ് വാഹനത്തിലുണ്ടായിരുന്നത്.

സ്ത്രീകളും കുട്ടികളും അടക്കം 19 പേരാണ് വാഹനത്തിലുണ്ടായിരുന്നത്. സംഭവം നടന്നയുടൻ തന്നെ നാട്ടുകാരും പൊലീസും ഫയർഫോഴ്സും സ്ഥലത്തെത്തി രക്ഷാപ്രവർത്തനം നടത്തി. പരിക്കേറ്റവരെ ആശുപത്രിയിൽ പ്രവേശിപ്പിച്ചിരിക്കുകയാണ്. ഇവിടെ സ്ഥിരം അപകട മേഖലയാണെന്ന് പ്രദേശവാസികൾ പറഞ്ഞു.