കോട്ടയം: രാവിലെ ദോശ കഴിക്കാൻ ഇഷ്ടമില്ലാത്തവരായി ആരും തന്നെ കാണില്ല എന്നാല്‍ അതൊരു സ്വാദിഷ്ടമായ മസാല ദോശ ആയാലോ. കുട്ടികള്‍ക്കും മുതിർന്നവർക്കും എല്ലാ മലയാളികള്‍ക്കും പ്രിയങ്കരമായ പ്രാതല്‍ വിഭവം മസാല ദോശ രുചികരമായി തയ്യാറാക്കിയാലോ.
ചേരുവകള്‍
ദോശ മാവ്
ഉപ്പ് – ആവശ്യത്തിന്
നെയ്യ്
മസാലയ്ക്ക് ആവശ്യമായ ചേരുവകള്‍
Whatsapp Group 1 | Whatsapp Group 2 |Telegram Group
വെളിച്ചെണ്ണ – 2 ടേബിള്‍ സ്പൂണ്‍
കടുക് – 1 ടീസ്പൂണ്‍
വറ്റല്‍ മുളക് – 4 എണ്ണം
കറിവേപ്പില – 2 തണ്ട്
ഇഞ്ചി (ചെറുതായി അരിഞ്ഞത്)- 1 ½ ടേബിള്‍ സ്പൂണ്‍
പച്ചമുളക് – 4 എണ്ണം
സവാള – 4 എണ്ണം
ഉരുളക്കിഴങ്ങ് (പുഴുങ്ങിയത്)- 4 എണ്ണം
കാരറ്റ് – 1
മഞ്ഞള്‍പ്പൊടി – 1 ടീസ്പൂണ്‍
മല്ലിയില – ½ കപ്പ്
ഉപ്പ് – ആവശ്യത്തിന്
വെള്ളം – ആവശ്യത്തിന്
തയ്യാറാക്കുന്ന വിധം
ഒരു ഫ്രൈ പാനില്‍ രണ്ട് ടേബിള്‍ സ്പൂണ്‍ വെളിച്ചെണ്ണ ഒഴി‍ച്ച്‌ ഒരു ടീസ്പൂണ്‍ കടുക് ഇട്ട് പൊട്ടിക്കുക. കടുക് പൊട്ടിക്കഴിയുമ്പോള്‍ തീ കുറയ്ക്കാം അതിനുശേഷം നാല് വറ്റല്‍മുളക്, കുറച്ച്‌ കറിവേപ്പില, ചെറുതായി അരിഞ്ഞ ഇഞ്ചിയും പച്ചമുളകും ഇട്ട് ഇതെല്ലാം ഒന്ന് വാടിക്കഴിയുമ്ബോള്‍ അരിഞ്ഞു വച്ചിരിക്കുന്ന സവാള ചേർക്കാം. സവാള പെട്ടെന്ന് വഴന്നു വരാൻ വേണ്ടി ഉപ്പ് ചേർത്തു കൊടുക്കാം. ഇതിന്റെ കൂടെ അര ടീസ്പൂണ്‍ മഞ്ഞള്‍പ്പൊടി കൂടി ചേർത്ത് ഇളക്കുക. ഇത് വഴന്ന് വരുന്ന സമയത്ത് പുഴുങ്ങി വച്ചിരിക്കുന്ന ഉരുളക്കിഴങ്ങിന്റെ തൊലി കളയാം. ഇനി സവാളയിലേക്ക് നമുക്ക് കാല്‍ കപ്പ് വെള്ളം ഒഴിച്ചു കൊടുക്കാം. അപ്പോള്‍ കുറച്ച്‌ വെന്ത് കുഴഞ്ഞിരിക്കും അത് മസാലയ്ക്ക് നല്ലതാണ്. സവാള നന്നായി കുഴഞ്ഞു വന്നുകഴിയുമ്പോള്‍ കാരറ്റ് ചേർക്കാം. അതിനുശേഷം പൊടിച്ചു വച്ചിരിക്കുന്ന ഉരുളക്കിഴങ്ങ് ചേർത്ത് നന്നായി മിക്സ് ചെയ്യാം. അര ടീസ്പൂണ്‍ മഞ്ഞള്‍പ്പൊടി കൂടി ചേർത്തിളക്കുക. ഇനി ഒരു അരക്കപ്പ് വെള്ളം കൂടി ചേർത്ത് നന്നായി ഇളക്കുക. കുറച്ചു മല്ലിയില കൂടി ചേർക്കാം. ഇനി ഉപ്പും വെള്ളവും വേണമെങ്കില്‍ ആവശ്യത്തിന് വീണ്ടും ചേർക്കുക. മസാല റെഡി.
ദോശക്കല്ല് നന്നായി ചൂടായശേഷം ദോശ മാവ് പരത്തി പുറമെ നെയ് പുരട്ടി മൊരിഞ്ഞു വരുന്ന ദോശയിലേക്ക് മസാല മിക്സ് വച്ച്‌ മടക്കി എടുക്കുക. മസാല ദോശ തയ്യാർ.
