മനയ്ക്കച്ചിറ പള്ളിക്കുസമീപം പൈപ്പ് പൊട്ടി റോഡില്‍ വൻ ഗര്‍ത്തം; ഒരാഴ്ചക്കാലമായി ഇവിടെ ശുദ്ധജലം പാഴാവുകയാണ്

സ്വന്തം ലേഖിക

ചങ്ങനാശേരി: മനയ്ക്കച്ചിറയില്‍ നിന്നും പെരുമ്പുഴക്കടവിലേക്കുള്ള റോഡില്‍ മനയ്ക്കച്ചിറ പള്ളിക്കു സമീപം പൈപ്പ് പൊട്ടി വെള്ളം റോഡിലൂടെ ഒഴുകുന്നു.

കഴിഞ്ഞ ഒരാഴ്ചക്കാലമായി ഇവിടെ ശുദ്ധജലം പാഴാവുകയാണ്. പൈപ്പ് പൊട്ടിയതിനെ തുടര്‍ന്ന് റോഡില്‍ പാകിയിരിക്കുന്ന ഇന്‍റര്‍ ലോക്ക് തകര്‍ന്നു. അങ്ങനെ റോഡില്‍ ഗര്‍ത്തവും രൂപപ്പെട്ടു.

കഴിഞ്ഞ ദിവസം ഈ ഗട്ടറില്‍ സ്‌കൂട്ടര്‍ തെന്നിമറിഞ്ഞ് യാത്രക്കാരനായ കളത്തില്‍ അനീഷ് ജോസഫിന് പരിക്കേറ്റു. റോഡ് തകര്‍ന്നതോടെ ഈ റോഡിലൂടെ സ്‌കൂള്‍ ബസുകള്‍ ഉള്‍പ്പെടെ വലിയ വാഹനങ്ങളുടെ സഞ്ചാരം നിലച്ചു.

റോഡില്‍ വെള്ളം കെട്ടിക്കിടക്കുന്നതുമൂലം കാല്‍നടപ്പും ദുരിതമാണ്. മനയ്ക്കച്ചിറയില്‍ നിന്നും പൂവം, പെരുമ്പുഴക്കടവ് ഭാഗങ്ങളിലേക്കുള്ള റോഡാണിത്. ഈ റോഡില്‍ പൈപ്പ് പൊട്ടി ശുദ്ധജലം പാഴാകുന്നത് നിത്യസംഭവമാണെന്ന് നാട്ടുകാര്‍ പറഞ്ഞു.