ഉമ്മൻ ചാണ്ടിയുടെ ചികിത്സാ വിവാദം; കോൺഗ്രസ് നേതൃത്വം മറുപടി നൽകും; പ്രതികരിക്കാനില്ലെന്ന് ചാണ്ടി ഉമ്മൻ

സ്വന്തം ലേഖകൻ

കോട്ടയം: ഉമ്മൻചാണ്ടിയുടെ ചികിത്സ സംബന്ധിച്ച് കോൺഗ്രസ് നേതൃത്വം മറുപടി നൽകുമെന്ന് ചാണ്ടി ഉമ്മൻ . സി.പി.എം സംസ്ഥാന സമിതിയംഗം അഡ്വ. കെ. അനിൽ കുമാറിന്‍റെ ഫേസ്ബുക്ക് കുറിപ്പിനോട് പ്രതികരിച്ചാണ് യു.ഡി.എഫ് സ്ഥാനാർഥി ചാണ്ടി ഉമ്മന്റെ പ്രതികരണം.

ചികിത്സ നൽകിയത് സംബന്ധിച്ച് നടന്നത് എന്താണ് എല്ലാവർക്കും അറിയാം. ഈ വിഷയത്തിൽ കൂടുതൽ പ്രതികരിക്കാനില്ലെന്നും ചാണ്ടി ഉമ്മൻ വ്യക്തമാക്കി.

പുതുപ്പള്ളി ഉപതെരഞ്ഞെടുപ്പ് വേളയിൽ ഉമ്മൻചാണ്ടിയുടെ ചികിത്സ വിവാദം വീണ്ടും ഉയർത്തി കോട്ടയം ജില്ലയിലെ സി.പി.എം നേതാവായ കെ. അനിൽകുമാറാണ് രംഗത്തെത്തിയത്. ഉമ്മൻചാണ്ടിയുടെ ചികിത്സ ഉറപ്പാക്കാൻ സർക്കാർ ഇടപെടേണ്ടി വന്നുവെന്ന് അനിൽ കുമാർ ഫേസ്ബുക്കിൽ കുറിച്ചു. സർക്കാർ ഇടപെടാനുള്ള സാഹചര്യം ഒരുക്കിയത് പ്രതിപക്ഷ നേതാവ് വി.ഡി സതീശനാണെന്നും അനിൽ കുമാർ ആരോപിച്ചു.