സ്വന്തം ലേഖകൻ
കോട്ടയം: ഹൃദയം തുറക്കാതെ വാല്വ് മാറ്റുന്ന നൂതന ശസ്ത്രക്രിയയായ ടാവി വിജയകരമായി നടത്തി കോട്ടയം മെഡിക്കല് കോളേജ് ആശുപത്രി. രക്തക്കുഴലുകളില് കൂടി കടത്തിവിടുന്ന ട്യൂബിലൂടെ (കത്തീറ്റര്) ഹൃദയ വാല്വ് മാറ്റുന്ന ശസ്ത്രക്രിയ ആണ് നടത്തിയത്. കോട്ടയം മെഡിക്കല് കോളജില് ഇതാദ്യമായാണ് ടാവി ശസ്ത്രക്രിയ നടക്കുന്നത്.
പത്തനംതിട്ട സ്വദേശിയായ അറുപത്തിയൊന്നുകാരിയാണ് ശസ്ക്രിയയ്ക്ക് വിധേയയായത്. ശനിയാഴ്ച നടന്ന ശസ്ത്രക്രിയയ്ക്കു ശേഷം രോഗി സുഖം പ്രാപിച്ചു വരുന്നു. വിജയകരമായി ശസ്ത്രക്രിയ നടത്തിയ മുഴുവന് ടീമിനും ആരോഗ്യ മന്ത്രി വീണാ ജോര്ജ് അഭിനന്ദനമറിയിച്ചു.
Whatsapp Group 1 | Whatsapp Group 2 |Telegram Group
തകരാറിലായ അയോര്ട്ടിക് വാല്വ് മാറ്റിവയ്ക്കേണ്ടതും എന്നാല് പ്രായാധിക്യമോ മറ്റ് അവശതകളോ കാരണം ഹൃദയം തുറന്നുള്ള ശസ്ത്രക്രിയയ്ക്ക് വിധേയരാകാന് സാധിക്കാത്തവരിലുമാണ് ടാവി ചെയ്യുന്നത്. അയോര്ട്ടിക് സ്റ്റിനോസിസ് ഉള്ളപ്പോഴും വളരെ ചുരുക്കമായി അയോര്ട്ടിക് വാല്വിന് ചോര്ച്ച വരുന്ന അവസ്ഥയിലുമാണ് ടാവി ചെയ്യാറുള്ളത്.
മെഡിക്കല് കോളജ് സൂപ്രണ്ട് ഡോ. ടി.കെ. ജയകുമാര്, കാര്ഡിയോളജി വിഭാഗം മേധാവി ഡോ. വി.എല്. ജയപ്രകാശ്, ഡോ. ആശിഷ് കുമാര്, ഡോ. എന്. ജയപ്രസാദ്, ഡോ. സുരേഷ് മാധവന്, ഡോ. മഞ്ജുനാഥ്, ഡോ. പി.ജി അനീഷ്, ഡോ. മഞ്ജുഷ പിള്ള, നഴ്സുമാരായ എലിസബത്ത്, ഗോപിക, ടെക്നീഷ്യന്മാരായ അരുണ, ജിജിന്, സന്ധ്യ എന്നിവരടങ്ങിയ മെഡിക്കല് സംഘമാണ് ടാവിക്ക് നേതൃത്വം നല്കിയത്. പ്രിന്സിപ്പല് ഡോ. ശങ്കറും സന്നിഹിതനായിരുന്നു. 13 ലക്ഷം രൂപ ചെലവു വരുന്ന ശസ്ത്രക്രിയ ഏകദേശം 11 ലക്ഷം രൂപയ്ക്ക് പൂര്ത്തീകരിക്കാനായി.
