തിരുവനന്തപുരം : നെയ്യാറ്റിന്കര നിംസ് ആശുപത്രിയില് സ്വാതന്ത്ര്യസമര സേനാനികളുടെ സ്മൃതി മണ്ഡപം ഉദ്ഘാടനം ചെയ്യാനെത്താതിരുന്നതോടെയാണ് സംഭവം വിവാദമായത്. ഗാന്ധിയന് ഗോപിനാഥന്നായരുടെയും കെ.ഇ മാമന്റെയും ബന്ധുക്കളും കെപിസിസി അദ്ധ്യക്ഷന് കെ. സുധാകരനും ശശി തരൂരും അടക്കമുള്ള നേതാക്കളും അടക്കം വന് ജനക്കൂട്ടം എത്തിയിട്ടും മുന്നിലൂടെ ജാഥയില് നടന്നു പോയ രാഹുല് ഗാന്ധി എത്തിയില്ല.
ഇത്തരം തീരുമാനങ്ങളാണ് വിശ്വാസ്യത ഇല്ലാതാക്കുന്നതെന്ന് ശശി തരൂര് തുറന്നു പറഞ്ഞു. നിംസ് എംഡിയോട് കെപിസിസി അദ്ധ്യക്ഷന് ക്ഷമാപണം നടത്തുന്ന ദൃശ്യങ്ങളും പുറത്തുവന്നു. ഈയിടെ അന്തരിച്ച ഗാന്ധിയന് ഗോപിനാഥന് നായരുടെയും കെ.ഇ മാമന്റെയും സ്മൃതി മണ്ഡപമാണ് നെയ്യാറ്റിന്കര നിംസില് നിര്മിച്ചത്.
ഭാരത് ജോഡോ യാത്ര ഇതിന് മുന്നിലൂടെ കടന്നുപോകുമ്പോള് രാഹുല് ഗാന്ധി ഉദ്ഘാടനം ചെയ്യാനായിരുന്നു നേരത്തെയുണ്ടായിരുന്ന തീരുമാനം. ജാഥയുടെ വിവരങ്ങള് അടങ്ങിയ വാര്ത്താക്കുറിപ്പിലും ഇക്കാര്യം മാധ്യമങ്ങളെ അറിയിച്ചിരുന്നു.
Whatsapp Group 1 | Whatsapp Group 2 |Telegram Group
വൈകീട്ട് നാല് മണിക്ക് മുൻപ് തന്നെ കെപിസിസി അധ്യക്ഷന് കെ സുധാകരന്, ശശി തരൂര് എംപി, യുഡിഎഫ് കണ്വീനര് എംഎം ഹസ്സന്, ഡിസിസി അദ്ധ്യക്ഷന് പാലോട് രവി, വിഎസ് ശിവകുമാര് തുടങ്ങിയ നേതാക്കളെത്തി. ഗോപിനാഥന് നായരുടെ ഭാര്യയും കുടുംബാംഗങ്ങളും കെഇ മാമന്റെ കുടുംബാംഗങ്ങളും എത്തി. ജാഥ ഇതിന് മുന്നിലൂടെ കടന്നുപോയി. പക്ഷേ രാഹുല് ഗാന്ധി എത്തിയില്ല.
സംഭവം കോണ്ഗ്രസ് നേതാക്കള്ക്ക് വലിയ നാണക്കേടായി. പറയാമെന്നല്ലാതെ എന്ത് ചെയ്യാന് കഴിയുമെന്നാണ് കെപിസിസി അധ്യക്ഷന് കെ സുധാകരന് പറഞ്ഞത്. ഇത്തരം തീരുമാനങ്ങളാണ് വിശ്വാസ്യത ഇല്ലാതാക്കുന്നതാണെന്നും വിശ്വാസ്യതയെത്തന്നെ ബാധിക്കുമെന്നും ശശി തരൂരും തുറന്നടിച്ചു. മറ്റൊരു അവസരത്തില് നന്നായി ചടങ്ങ് സംഘടിപ്പിക്കാമെന്ന് ഉറപ്പ് നല്കിയ കെ സുധാകരന് ആശുപത്രി അധികൃതരോട് ക്ഷമ ചോദിക്കുകയും ചെയ്തു.
