കിടപ്പുമുറിയിൽ ദമ്പതിമാരെ മരിച്ച നിലയിൽ കണ്ടെത്തി ; ഭാര്യയെ കൊലപ്പെടുത്തിയതിന് ശേഷം ഭർത്താവ് ആത്മഹത്യ ചെയ്തതാവാമെന്ന് പ്രാഥമിക നിഗമനം

സ്വന്തം ലേഖകൻ

കണ്ണൂർ : കിടപ്പുമുറിയിൽ ദമ്പതിമാരെ മരിച്ച നിലയിൽ കണ്ടെത്തി. കണ്ണൂർ മുഴക്കുന്നിനടുത്ത് കടുക്കപ്പാലത്ത് പൂവളപ്പിൽ മോഹൻദാസ് (53 ). ഭാര്യ ജ്യോതി (44 ) എന്നിവരെയാണ് കിടപ്പുമുറിയിൽ മരിച്ച നിലയിൽ കണ്ടെത്തിയത്. മോഹൻദാസിനെ മുണ്ടിൽ തൂങ്ങിയ നിലയിലും ഭാര്യ ജ്യോതി കട്ടിലിൽ മരിച്ച നിലയിലുമായിരുന്നു. വീട്ടമ്മയുടെ മരണത്തിൽ ദുരൂഹതയുണ്ടെന്ന് ബന്ധുക്കൾ പറഞ്ഞു.

രാവിലെ വീട് തുറക്കാത്തത് ശ്രദ്ധയിൽപ്പെട്ട ബന്ധു തിരക്കിയെത്തിയപ്പോഴാണ് ദമ്പതികളെ മരിച്ച നിലയിൽ കണ്ടത് . ഉടൻ ഇയാൾ പോലീസിൽ വിവരം അറിയിക്കുകയായിരുന്നു. മോഹൻദാസ് മദ്യപിച്ചെത്തി ജ്യോതി യുമായി വഴക്ക് പതിവായിരുന്നുവെന്നും ചില സാമ്പത്തിക പ്രശ്‌നങ്ങൾ ഇവരെ അലറ്റിയിരുന്നുവെന്നും ബന്ധുക്കൾ പറയുന്നു.

അതേസമയം ജ്യോതിയെ കൊലപ്പെടുത്തിയതിന് ശേഷം മോഹൻദാസ് ആത്മഹത്യ ചെയ്തതാവാം എന്നാണ് പ്രാഥമിക നിഗമനം. സംഭവത്തിൽ പൊലീസ് അന്വേഷണം ആരംഭിച്ചു.