ഫെയർവെല്ലിന് ബൈക്കിൽ അഭ്യാസപ്രകടനം നടത്താൻ വിദ്യാർത്ഥികളുടെ തീരുമാനം ; രഹസ്യവിവരത്തെ തുടർന്ന് മോട്ടോർ വാഹന വകുപ്പ് ഉദ്യോഗസ്ഥർ പിടികൂടിയത് 35 ബൈക്കുകൾ

സ്വന്തം ലേഖകൻ

കൊല്ലം: ഫെയർവെല്ലിന് ബൈക്കുകളിൽ അഭ്യാസ പ്രകടനം നടത്താൻ വിദ്യാർത്ഥികളുടെ തീരുമാനം. ആർ.ടി.ഒ ഉദ്യോഗസ്ഥർക്ക് രഹസ്യ വിവരം ലഭിച്ചിരുന്നതിനെ തുടർന്ന് ആർടിഒ സകൂളിൽ നടത്തിയ പരിശോധനയിലാണ് 35 ഓളം ബൈക്കുകൾ പിടിച്ചെടുത്തത് . കൊല്ലം കടയ്ക്കലിലാണ് സംഭവം.

കുറ്റിക്കാട് സിപി ഹയർ സെക്കൻഡറി സ്‌കൂൾ, കോട്ടപ്പുറം പിഎംഎസ്എ ആർട്‌സ് ആൻഡ് സയൻസ് കോളേജ് എന്നിവടങ്ങിലാണ് മോട്ടോർ വാഹന വകുപ്പ് എൻഫോഴ്‌സ്‌മെന്റ്രെ മിന്നൽപരിശോധന നടത്തിയത് . രണ്ടാം വർഷ വിദ്യാർഥികൾ പിരിഞ്ഞു പോകുന്നതിന്റെ ആഘോഷത്തിനായി ബൈക്കഭ്യാസം നടത്താൻ വിദ്യാർത്ഥികൾ തീരുമാനിച്ചിരുന്നു . എന്നാൽ ബൈക്കുകളിൽ അമിത വേഗത കാട്ടി അഭ്യാസം നടത്തുമെന്നു മോട്ടോർ വാഹന വകുപ്പിന് മുൻകൂട്ടി വിവരം ലഭിച്ചു . ഇതിനെ തുടർന്നാണ് ഉദ്യോഗസ്ഥർ സിപി ഹയർ സെക്കൻഡറി സ്‌കൂളിൽ എത്തിയത്. പിഎംഎസ്എ കോളജിൽ കോളേജിനകത്ത് പരിശോധന നടത്തി സൈലൻസർ ഉൾപ്പെടെ രൂപം മാറ്റിയത് കണ്ടെത്തി പിഴ ഈടാക്കി.

ഉദ്യോഗസ്ഥരുടെ മുൻകരുതൽ നടപടിയോടെ ബൈക്കുമായി അഭ്യാസപ്രകടനം നടത്താൻ എത്തിയ വിദ്യാർഥികൾക്ക് പിഴയും സ്വീകരിച്ച് മടങ്ങേണ്ടി വന്നു. 43,000 രൂപ പിഴയിനത്തിൽ നിന്നും ലഭിച്ചെന്ന് ഉദ്യോഗസ്ഥർ പറഞ്ഞു . ലൈസൻസില്ലാതെ വാഹനം ഓടിച്ചതിനും അമിത വേഗതയക്കും സൈലൻസർ ഉൾപ്പെടെ രൂപ മാറ്റം വരുത്തിയതിനുമാണ് പിഴ ഈടാക്കിയത് .