ലഹരി മരുന്നു കൈവശം വച്ചതിന് അറസ്റ്റിലായ പ്രതി കോടതി മുറിയിൽ കഞ്ചാവ് വലിച്ചു ; പ്രതിക്കൂട്ടിൽ കയറിയപ്പോൾ പോക്കറ്റിൽ സൂക്ഷിച്ചിരുന്ന കഞ്ചാവിന് തീ കൊളുത്തുകയായിരുന്നു

സ്വന്തം ലേഖകൻ

വാഷിങ്ടൺ: ലഹരിമരുന്ന് കൈവശം വച്ചതിന് അറസ്റ്റിലായ പ്രതി കോടതിമുറിയിൽ കഞ്ചാവ് വലിച്ചു. ടെന്നീസിലെ ജനറൽ സെഷൻസ് കോടതിയിലാണ് ലഹരിമരുന്ന് കേസിലെ പ്രതി കോടതിമുറിക്കുള്ളിൽ കയറി കഞ്ചാവ് സിഗരറ്റ് വലിച്ചത്.

അലൻ ബോസ്റ്റൺ എന്ന ഇരുപതുവയസ്സുകാരനാണ് ലെബനനിലെ കോടതിമുറിക്കുള്ളിൽ കഞ്ചാവ് സിഗരറ്റ് വലിച്ചത്. . ലഹരിമരുന്ന് കൈവശം വച്ചെന്ന കേസിലാണ് ബോസ്റ്റണെ കഴിഞ്ഞദിവസം കോടതിയിൽ ഹാജരാക്കിയത്. തുടർന്ന് കേസിന്റെ വാദം തുടങ്ങാനിരിക്കെ പ്രതിക്കൂട്ടിൽകയറിയ ബോസ്റ്റൺ പോക്കറ്റിൽ സൂക്ഷിച്ചിരുന്ന കഞ്ചാവിന് തീ കൊളുത്തുകയായിരുന്നു.

കഞ്ചാവ് നിയമവിധേയമാക്കുന്നതുമായി ബന്ധപ്പെട്ട് തനിക്ക് പറയാനുള്ളതും കേൾക്കണമെന്ന് ബോസ്റ്റൺ ആവശ്യമുന്നയിച്ചിരുന്നു. ഇതനുസരിച്ച് സംസാരിക്കാൻ അനുവാദം നൽകിയതിന് പിന്നാലെയാണ് യുവാവ് കഞ്ചാവ് വലിച്ചത്. കോടതിമുറിക്കുള്ളിൽ പുകയുയർന്നതോടെ പോലീസ് ബോസ്റ്റണെ പുറത്തേക്ക് കൊണ്ടുപോവുകയും കസ്റ്റഡിയിലെടുക്കുകയുമായിരുന്നു.