വൈറല്‍ ഹെപ്പറ്റൈറ്റിസുമായി ബന്ധപ്പെട്ട അസുഖങ്ങള്‍ മൂലം ഓരോ ദിവസവും 3000 പേർ വീതം മരിച്ചു വീഴുന്നു ; എന്താണ് ഹെപ്പറ്റൈറ്റിസുകള്‍ ; അറിഞ്ഞിരിക്കാം രോഗലക്ഷണങ്ങളും ചികിത്സാമാർഗങ്ങളും
നമ്മുടെ ശരീരത്തിലെ കരള്‍ കോശങ്ങളെ ബാധിക്കുന്ന ഒരു വൈറസ് രോഗമാണ് കരള്‍ വീക്കം അഥവാ വൈറല്‍ ഹെപ്പറ്റൈറ്റിസ് (viral hepatitis). മറ്റു പലകാരണങ്ങള്‍കൊണ്ടും കരള്‍വീക്കം ഉണ്ടാകാമെങ്കിലും വൈറസ് ബാധമൂലമുള്ള കരള്‍വീക്കം വളരെയധികം പ്രാധാന്യമർഹിക്കുന്നു.
പ്രധാനമായും അഞ്ചുതരത്തിലുള്ള വൈറസുകളാണ് കരള്‍ കോശങ്ങളെ മാത്രം സവിശേഷമായി ബാധിച്ച്‌ കരള്‍ വീക്കം ഉണ്ടാക്കുന്നത്. ഇവയെ ഹെപ്പറ്റൈറ്റിസ് എ, ബി, സി, ഡി, ഇ (Hepatitis A, B, C, D, E) എന്നിങ്ങനെ തരം തിരിച്ചിരിക്കുന്നു. ഇവയില്‍ ഹെപ്പറ്റൈറ്റിസ് ബി, സി (Hepatitis B, C) എന്നീ വകഭേദങ്ങളാണ് ഏറ്റവും കൂടുതലായി രോഗികളില്‍ കണ്ടുവരുന്നത്. ഈ രണ്ട് വൈറസുകള്‍ കാരണം മാത്രം പതിമൂന്ന് ലക്ഷത്തിലധികം രോഗികള്‍ എല്ലാ വർഷവും മരണപ്പെടുകയും ഏകദേശം മുപ്പതു ലക്ഷത്തിലധികം ആളുകള്‍ പുതുതായി രോഗബാധിതരാവുകയും ചെയ്യുന്നതായാണ് കണക്കുകള്‍ സൂചിപ്പിക്കുന്നത്.
ആയതിനാല്‍ സമൂഹത്തില്‍ ഇതേപ്പറ്റി അവബോധം സൃഷ്ടിക്കുന്നതിനു വേണ്ടി ആഗോളതലത്തില്‍ എല്ലാവർഷവും ജൂലൈ ഇരുപത്തെട്ടിന് (July 28th), ലോക കരള്‍ വീക്കദിനം അഥവാ World Hepatitis Day ആയി ആചരിക്കുന്നു. ലോകാരോഗ്യ സംഘടനയുടെ (WHO) ഏറ്റവും പുതിയ കണക്കുകള്‍ പ്രകാരം വൈറല്‍ ഹെപ്പറ്റൈറ്റിസുമായി ബന്ധപ്പെട്ട അസുഖങ്ങള്‍ മൂലം ഓരോ ദിവസവും 3000 പേർ വീതം മരിച്ചു വീഴുന്ന ഭീതിജനകമായ അവസ്ഥയാണ് ഇന്ന് ലോകത്ത് നിലനില്‍ക്കുന്നത്. അതുകൊണ്ടുതന്നെ ഈ സമൂഹത്തില്‍ “നാം പ്രവർത്തിക്കേണ്ട സമയം ആയിരിക്കുന്നു’. അഥവാ “Its time for action”എന്നതാണ് ഈ വർഷത്തെ World Hepatitis Day സന്ദേശമായി നല്‍കിയിരിക്കുന്നത്. എന്താണ് ഈ സന്ദേശത്തിന്റെ യഥാർഥ ഉദ്ദേശ ലക്ഷ്യങ്ങള്‍ എന്ന് കുറച്ചുകൂടി വ്യക്തമായി മനസ്സിലാക്കാൻ ശ്രമിക്കാം.
Whatsapp Group 1 | Whatsapp Group 2 |Telegram Group
ഹെപ്പറ്റൈറ്റിസ് ടെസ്റ്റുകളും രോഗിനിർണയത്തിനുള്ള സൗകര്യങ്ങളും വിപുലമാക്കുന്നതിലൂടെ കൂടുതല്‍ രോഗികള്‍ക്ക് ചികിത്സ സാദ്ധ്യമാക്കുന്ന സാഹചര്യം ഉറപ്പാക്കാനുള്ള പ്രവർത്തനങ്ങള്‍ തുടക്കം കുറിക്കുക. വാക്സിനേഷനിലൂടെയും അവബോധ പ്രവർത്തങ്ങളിലൂടെയും ഹെപ്പറ്റൈറ്റിസ് പ്രതിരോധ പ്രവർത്തനങ്ങള്‍ ശാക്തീകരിക്കനുള്ള ശ്രമങ്ങള്‍ ഊർജ്ജിതമാക്കുക. ഹെപ്പറ്റൈറ്റിസ് രോഗനിർണ്ണയവും ചികിത്സയും പ്രാഥമിക ആരോഗ്യ കേന്ദ്രങ്ങളിലേക്കും സാമൂഹികാ ചികിത്സാ സംവിധാനങ്ങളിലേക്കും ലഭ്യമാക്കുന്നതിലൂടെ കൂടുതല്‍ പേരിലേക്ക് ചികിത്സ എത്തിക്കുന്നതിനുള്ള ശ്രമങ്ങള്‍ക്കു തുടക്കമിടുക.
കൂടുതല്‍ സാമൂഹികവും സാമ്ബത്തികവുമായ ഇടപെടലുകളിലൂടെ ഹെപ്പറ്റൈറ്റിസ് പ്രതിരോധ ചികിത്സാ പ്രവർത്തനങ്ങളും നിർമ്മാർജന യജ്ഞവും ഊർജിതമാക്കുക.അതായത് ഹെപ്പറ്റൈറ്റിസിന് എതിരെയുള്ള പ്രവർത്തനങ്ങളില്‍ ടെസ്റ്റിങ്ങിനും ചികിത്സയ്ക്കും വാക്സിനേഷനും കൂടുതല്‍ പ്രാമുഖ്യം നല്‍കി ഹെപ്പറ്റൈറ്റിസ് മുക്ത ലോകം സാധ്യമാക്കുക എന്നതാണ് ലക്ഷ്യം വെക്കുന്നത്.
വിവിധതരം ഹെപ്പറ്റൈറ്റിസുകള്‍ (Hepatitis A, B, C, D, E)
ഹെപ്പറ്റൈറ്റിസ് ബി, സി (Hepatitis B, C)
വൈറല്‍ ഹെപ്പറ്റൈറ്റിസില്‍ ഏറ്റവും കൂടുതലായി കാണപ്പെടുന്നതും സങ്കീർണതകള്‍ നിറഞ്ഞതും ഹെപ്പറ്റൈറ്റിസ് ബി, സി (Hepatitis B, C) എന്നിവയാണ്. രോഗബാധിതരായ ആളുകളുടെ രക്തം, മറ്റു ശരീരസ്രവങ്ങള്‍ എന്നിവയുമായുള്ള സമ്ബർക്കത്തിലൂടെയാണ് ഈ രോഗങ്ങള്‍ പ്രധാനമായും പകരുന്നത്. രോഗിയുമായി ലൈംഗിക ബന്ധത്തിലേർപ്പെടുന്നവർക്കും രോഗബാധിതയായ അമ്മയില്‍ നിന്നു കുഞ്ഞുങ്ങളിലേക്കും ഈ രോഗം പകരാവുന്നതാണ്. ഹെപ്പറ്റൈറ്റിസ് ബി, സി (Hepatitis B, C) എന്നിവ ചില രോഗികളില്‍ ദീർഘകാലം നീണ്ടുനില്‍ക്കുന്ന ക്രോണിക് ഹെപ്പറ്റൈറ്റിസ് (Chronic Hepatitis) എന്ന അസുഖത്തിന് കാരണമാവുകയും കാലക്രമേണ ഇവ സിറോസിസ് (Cirrhosis), ലിവർ കാൻസർ(Liver cancer) തുടങ്ങിയ ഗുരുതര പ്രശ്നങ്ങള്‍ ഉടലെടുക്കാൻ നിമിത്തമാവുകയും ചെയ്യുന്നു.
ഹെപ്പറ്റൈറ്റിസ് ഡി (Hepatitis D)
ഹെപ്പറ്റൈറ്റിസ് ബി (Hepatitis B) രോഗികളെ മാത്രം ബാധിക്കുന്ന വൈറസാണ് ഹെപ്പറ്റൈറ്റിസ് ഡി (Hepatitis D) വൈറസ്. ഒരുമിച്ചുള്ള ഹെപ്പറ്റൈറ്റിസ് ബി – ഡി (Hepatitis B – D) രോഗബാധ (Co-infection / Super infection) വളരെ തീവ്രതയുള്ളതും സങ്കീർണവുമാണ്.
ഹെപ്പറ്റൈറ്റിസ് എ, ഇ വൈറസ് (Hepatitis A, E virus)
വൈറസ് ബാധയാല്‍ മലിനമായ വെള്ളത്തിലൂടെയോ ഭക്ഷണപദാർഥങ്ങളിലൂടെയോ ആണ് ഈ രോഗങ്ങള്‍ പകരുന്നത്. ഹെപ്പറ്റൈറ്റിസ് ബി, സി (Hepatitis B, C) എന്നിവയെ അപേക്ഷിച്ച്‌ സാധാരണ ഗതിയില്‍ ദീർഘകാല സങ്കീർണതകള്‍ക്ക് ഈ രോഗങ്ങള്‍ കാരണമാകാറില്ല.
രോഗലക്ഷണങ്ങള്‍
മഞ്ഞപ്പിത്തം, ശരീരക്ഷീണം, വയറുവേദന, പനി, വിശപ്പില്ലായ്മ തുടങ്ങിയവ ശ്രദ്ധയില്‍പ്പെട്ടാല്‍ ഉടൻതന്നെ ഒരു ഡോക്ടറുടെ സേവനം തേടുകയും ആവശ്യമെങ്കില്‍ ടെസ്റ്റുകള്‍ക്ക് വിധേയനാകേണ്ടതുമാണ്.
ചികിത്സാമാർഗങ്ങള്‍
ഹെപ്പറ്റൈറ്റിസ് ബി, സി (Hepatitis B, C) രോഗങ്ങള്‍ക്ക് ഫലപ്രദമായ ആന്റിവൈറല്‍ ചികിത്സ ഇന്നു ലഭ്യമാണ്. ചികിത്സ കൃത്യസമയത്തു സ്വീകരിക്കുന്നതിലൂടെ രോഗം ഭേദമാക്കുന്നതിനും സിറോസിസ്, ലിവർ കാൻസർ തുടങ്ങിയ ഗുരുതര പ്രശ്നങ്ങള്‍ ഉടലെടുക്കുന്നത് തടയുന്നതിനും കഴിയും. ഹെപ്പറ്റൈറ്റിസ് എ, ഇ (Hepatitis A, E) രോഗങ്ങള്‍ക്ക് പ്രത്യേക ആന്റിവൈറല്‍ മരുന്നുകള്‍ ആവശ്യമില്ല. കൃത്യമായ രോഗീ പരിചരണത്തിലൂടെയും കരളിന്റെ ആരോഗ്യം നിലനിർത്തുന്നതിനുള്ള ചികിത്സയിലൂടെയും ഈ രോഗങ്ങളെ നമുക്കു കീഴ്പ്പെടുത്താനാവും.
എങ്ങനെ പ്രതിരോധിക്കാം?
1. ശുചിത്വമുള്ള ആഹാരം, തിളപ്പിച്ചാറ്റിയ വെള്ളം എന്നിവ ഉറപ്പാക്കുന്നതിലൂടെ ഹെപ്പറ്റൈറ്റിസ് എ, ഇ (Hepatitis A, E) രോഗബാധ തടയാൻ കഴിയും. പ്രത്യേകിച്ചും യാത്രാവേളകളില്‍ വൃത്തിഹീനമായ സാഹചര്യത്തില്‍ നിന്നുള്ള ഭക്ഷണം, വെള്ളം എന്നിവ ഒഴിവാക്കേണ്ടതാണ്.
2. ഹെപ്പറ്റൈറ്റിസ് ബി, സി (Hepatitis B, C) രോഗങ്ങള്‍ പ്രതിരോധിക്കുന്നതിന് താഴെ പറയുന്ന മാർഗങ്ങള്‍ സ്വീകരിക്കാം.
രക്തവുമായി സമ്ബർക്കത്തില്‍ വരുന്ന ഉപകരണങ്ങള്‍ (സൂചികള്‍, ആശുപത്രി ഉപകരണങ്ങള്‍ എന്നിവ) ഒരിക്കല്‍ മാത്രം ഉപയോഗിക്കുന്നു വെന്ന് ഉറപ്പുവരുത്തുക.
ഷേവിംഗ് സെറ്റ്, ബ്ലേഡ്, ടൂത്ത് ബ്രഷ് എന്നിവ പങ്കുവയ്ക്കാതിരിക്കുക.
ടാറ്റു, അക്യുപങ്ചർ (tattoo, acupuncture) തുടങ്ങിയവ സുരക്ഷിതമായ സ്ഥലങ്ങളില്‍ നിന്നു മാത്രം സ്വീകരിക്കുക.
സുരക്ഷിതമായ ലൈംഗിക ബന്ധത്തില്‍ മാത്രം ഏർപ്പെടുക.
രോഗസാധ്യതയുള്ള സാഹചര്യത്തിലൂടെ കടന്നു പോകുന്നവർ ഹെപ്പറ്റൈറ്റിസിന്റെ സ്ക്രീനിംഗ് ടെസ്റ്റുകള്‍ക്ക് വിധേയരാവുക.
3. വാക്സിനുകള്‍
ഹെപ്പറ്റൈറ്റിസ് എ (Hepatitis A), ഹെപ്പറ്റൈറ്റിസ് ബി (Hepatitis B) രോഗങ്ങള്‍ക്ക് ഫലപ്രദമായ വാക്സിനുകള്‍ ഇന്നു ലഭ്യമാണ്. അവ സ്വീകരിച്ച്‌ രോഗം പകരുന്നത് ഒഴിവാക്കാം.
വൈറല്‍ ഹെപ്പറ്റൈറ്റിസിനെക്കുറിച്ചുള്ള ശരിയായ അവബോധം വ്യക്തികളില്‍ സൃഷ്ടിക്കപ്പെടുന്നതോടെ ഈ രോഗത്തെ നമുക്ക് പൂർണമായും നിയന്ത്രിച്ചു നിർത്താൻ സാധിക്കും.
