കുഞ്ഞുങ്ങളെ ഇല്ലാതാക്കുകയല്ല, സംരക്ഷിക്കുകയാണ്‌ ഇടതുപക്ഷ സർക്കാർ ചെയ്യുന്നത് : മന്ത്രി വീണ ജോർജ്

തിരുവനന്തപുരം: കുഞ്ഞുങ്ങളെ ഇല്ലാതാക്കുകയല്ല, സംരക്ഷിക്കുകയാണ്‌ ഇടതുപക്ഷ സർക്കാർ ചെയ്യുന്നതെന്ന് നിയമസഭയിൽ ആരോഗ്യമന്ത്രി വീണാ ജോർജ്. നിയമസഭയിലെ ചോദ്യോത്തരവേളയില്ലായിരുന്നു മന്ത്രിയുടെ പരാമർശം. ശിശു ജനന-മരണ നിരക്കിനെ സംബന്ധിച്ച ചോദ്യത്തിനാണ് മന്ത്രി ഇത്തരത്തിൽ മറുപടി നൽകിയത്. പാലക്കാട് എംഎൽഎ രാഹുൽ മാങ്കൂട്ടത്തിലിനെതിരായി നിർബന്ധിത ഗർഭഛിദ്ര അന്വേഷണം നടക്കുന്ന സാഹചര്യത്തിൽ മന്ത്രി നടത്തിയ പരാമർശം സമൂഹമാധ്യമങ്ങളിൽ ചർച്ചയായി.

പ്രതിപക്ഷ നേതാവ് വി ഡി സതീശന്റെ എതിർപ്പടക്കം അവഗണിച്ചാണ് രാഹുൽ കഴിഞ്ഞ ദിവസം നിയമസഭയിലേക്കെത്തിയത്. നേമം ഷജീർ അടക്കമുള്ള യുവ നേതാക്കൾക്കൊപ്പം പ്രത്യേക വാഹനത്തിലാണ് രാഹുൽ എത്തിയത്. സഭയിൽ എത്തിയതിന് പിന്നാലെ രാഹുലിന് ഒരു കുറിപ്പ് ലഭിച്ചിരുന്നു. ശേഷം രാഹുൽ സഭയിൽ നിന്നിറങ്ങിയിരുന്നു.

പിന്നാലെ മാധ്യമങ്ങളോട് സംസാരിച്ച രാഹുൽ തനിക്കെതിരായ ആരോപണങ്ങളുമായി ബന്ധപ്പെട്ട ചോദ്യങ്ങളിൽ നിന്നും ഒഴിഞ്ഞുമാറുകയാണ് ചെയ്‌തത്.