വാകേരിയിൽ ജനവാസ മേഖലയിൽ ഇറങ്ങിയ കടുവ ചത്തു ; പിന്‍വശത്തെ കാലിന് പരിക്ക്; അണുബാധ മൂലമാണ് കടുവ ചത്തതെന്ന് പ്രാഥമിക നിഗമനം

സ്വന്തം ലേഖകൻ
വയനാട്: വാകേരിയിൽ ജനവാസ മേഖലയിൽ ഇറങ്ങിയ കടുവയെ ചത്ത നിലയിൽ കണ്ടെത്തി. രാവിലെ ഏഴുമണിയോടെയാണ് കടുവയെ ചത്ത നിലയിൽ കണ്ടത്. പിന്‍വശത്തെ കാലിന് പരിക്കേറ്റ് പഴുപ്പ് ശരീരത്തില്‍ ബാധിച്ചതോടൊപ്പം ഉണ്ടായ അണുബാധ മൂലമാണ് കടുവ ചത്തതെന്നാണ് പ്രാഥമിക നിഗമനം.

ആറ് വയസോളം പ്രായമുള്ള പെണ്‍ കടുവയാണ് ചത്തത്. സ്വകാര്യവ്യക്തിയുടെ
കാപ്പിതോട്ടത്തിലാണ് ചത്ത നിലയിൽ കണ്ടത്.പോസ്റ്റുമോര്‍ട്ടത്തിന് ശേഷം തുടര്‍ വിവരങ്ങള്‍ ലഭ്യമാകുമെന്ന് സൗത്ത് വയനാട് ഡി എഫ് ഒ ഷജ്‌ന കരീം അറിയിച്ചു.

സുൽത്താൻ ബത്തേരി വട്ടത്താനി ഗാന്ധിനഗറിലാണ് കഴിഞ്ഞ ദിവസം കടുവയെ കണ്ടത്.വഴിയോരത്തെ മതിൽ ചാടിക്കടക്കാൻ ശ്രമിച്ച കടുവ സ്വകാര്യവ്യക്തിയുടെ കാപ്പിത്തോട്ടത്തിൽ ഒളിക്കുകയായിരുന്നു. തുടർന്ന് നാട്ടുകാരും സംയുക്തമായി പരിശോധന നടത്തിയെങ്കിലും കണ്ടെത്താനായില്ല.

കടുവയുടെ മുൻ കാലിന് പരിക്കേറ്റിട്ടുണ്ടായിരുന്നു. കടുവ റോഡിലൂടെ പോകുന്നത് നാട്ടുകാരിൽ ചിലർ പകർത്തിയ ദൃശ്യം നേരത്തെ പുറത്തുവന്നിരുന്നു.
മയക്കുവടി വെച്ച് കടുവയെ പിടികൂടാനിരിക്കെയാണ് ചത്ത നിലയിൽ കണ്ടെത്തിയത്.