സ്വന്തം ലേഖകന്‍
കോട്ടയം: ഏതു കെട്ടിടം പൊളിച്ചാലും അവിടുത്തെ മണ്ണ് അടിച്ചു മാറ്റുന്ന സ്വഭാവം കോട്ടയം നഗരസഭയ്ക്കുണ്ട്. ഇതാ തിരുനക്കര ബസ് സറ്റാന്‍ഡ് കെട്ടിടം പൊളിച്ചതിനു പിന്നാലെ അവിടെയും മണ്ണ് കടത്തിയത് വിവാദമായി. ഏകദേശം 100 ലോഡ് മണ്ണെങ്കിലും കടത്തിയിട്ടുണ്ടാവുമെന്നാണ് ഭരണ-പ്രതിപക്ഷമേന്യ കൗണ്‍സിലര്‍മാര്‍ ആരോപിക്കുന്നത്.
മണ്ണെടുക്കാന്‍ തുടങ്ങിയിട്ട് ഏതാനും ദിവസങ്ങളായെങ്കിലും വെള്ളിയാഴ്ച രാവിലെയാണ് കൗണ്‍സിലര്‍മാര്‍ ഇക്കാര്യംഅറിഞ്ഞത്.
ചെയര്‍പേഴ്‌സണും വൈസ് ചെയര്‍മാനും ഒഴികെയുള്ള എല്ലാ കൗണ്‍സിലര്‍മാരും സംഭവം അറിഞ്ഞയുടന്‍ തിരുനക്കരയിലെത്തി മണ്ണെടുപ്പു തടഞ്ഞു. തികച്ചും അന്യായമായ പ്രവര്‍ത്തിയാണ് കരാറുകാരന്‍ ചെയ്തതെന്ന് കൗണ്‍സിലര്‍മാര്‍ അഭിപ്രായപ്പെട്ടു. ഏതാണ്ട് ബസ് സ്റ്റാന്‍ഡിന്റെ നീളത്തില്‍ പത്തടി വീതിയില്‍ ഒരു മീറ്റര്‍ ആഴത്തിലാണ് മണ്ണു നീക്കിയത്. സറ്റാന്‍ഡിലെ കടകള്‍ ഉണ്ടായിരുന്ന പടിഞ്ഞാറു ഭാഗത്തെ മണ്ണെടുക്കുമ്പോഴാണ് കൗണ്‍ിസര്‍മാര്‍ എത്തി തടഞ്ഞത്.
സറ്റാന്‍ഡിന്റെ തറ നിരപ്പില്‍ നിന്ന് താഴേക്ക് ഒരു കാരണവശാലും കുഴിക്കാനോ മണ്ണെടുക്കാനോ അനുവാദമില്ലെന്ന് ഭരണപക്ഷ കൗണ്‍സിലര്‍ എം.പി.സന്തോഷ്‌കുമാര്‍, പ്രതിപക്ഷ നേതാവ് അഡ്വ.ഷീജ അനില്‍ എന്നിവര്‍ വ്യക്തമാക്കി. ഇവിടെനിന്നെടുത്ത അത്രയും മണ്ണ് തിരികെ ഇടണമെന്നും ഇക്കാര്യത്തില്‍ കോട്ടയം നഗരസഭയിലെ 52 കൗണ്‍സിലര്‍മാരും ഒറ്റക്കെട്ടാണെന്ന് എംപി സന്തോഷ്‌കുമാര്‍ പറഞ്ഞു. ചുറ്റുമുള്ള റോഡിലും താഴ്ന്നു നിന്നാല്‍ സറ്റാന്‍ഡിലേക്ക് വെള്ളം കയറുമെന്നും ഇത് ബസ് സറ്റാന്‍ഡിന്റെ നിലവിലുള്ള അവസ്ഥയ്ക്ക് ഭംഗം വരുത്തുമെന്നും് ഇവിടുത്തെ മുന്‍ വ്യാപാരി രവി അഭിപ്രായപ്പെട്ടു.
Whatsapp Group 1 | Whatsapp Group 2 |Telegram Group
കരാറുകാരന്‍ മാത്രമാണോ അതോ ഉദ്യോഗസ്ഥ തലത്തില്‍ ആരെങ്കിലും മണ്ണെടുപ്പുമായി ബന്ധപ്പെട്ടിട്ടുണ്ടോ എന്ന് അന്വേഷിക്കണമെന്ന് കൗണ്‍സിലര്‍മാര്‍ ആവശ്യപ്പെട്ടു.ഏന്തായാലും നഗരസഭാ ആസ്ഥാനത്തിനു തൊട്ടുമുന്നില്‍ നടക്കുന്ന മണ്ണെടുപ്പ് ഉദ്യോഗസ്ഥര്‍ അറിയാതിരിക്കില്ല. ഇതേക്കുറിച്ച് വിശദീകരണം ചോദിക്കുന്നതിനായി നഗരസഭാ ചെയര്‍പേഴ്‌സണ്‍, സെക്രട്ടറി എന്നിവരെ ഫോണില്‍ ബന്ധപ്പെടാന്‍ ശ്രമിച്ചെങ്കിലും ഇവര്‍ ഫോണ്‍ എടുത്തില്ല.
