ശബരിമലയിൽ തിരിച്ചടിച്ച് സുകുമാരൻ നായർ: കോന്നിയിൽ സുരേന്ദ്രൻ വീണ്ടും തോൽവി ഉറപ്പാക്കി; കേന്ദ്ര – സംസ്ഥാന സർക്കാരുകൾ ചതിച്ചെന്ന് എൻഎസ്എസ് ജനറൽ സെക്രട്ടറി

സ്വന്തം ലേഖകൻ

കോട്ടയം: ശബരിമല വിഷയം കൊണ്ട് സംസ്ഥാനത്തെ അഞ്ച് തിരഞ്ഞെടുപ്പുകളിൽ നേട്ടമുണ്ടാക്കാമെന്ന ബിജെപിയുടെയും ആർഎസ്എസിന്റെയും സംഘപരിവാറിന്റെയും മോഹത്തിന് വൻ തിരിച്ചടി. കോന്നിയിൽ സംസ്ഥാന ജനറൽ സെക്രട്ടറി കെ.സുരേന്ദ്രനെ തന്നെ സ്ഥാനാർത്ഥിയാക്കി തിരഞ്ഞെടുപ്പിൽ നേട്ടമുണ്ടാക്കാമെന്ന ബിജെപിയുടെയും ആർഎസ്എസിന്റെയും നിലപാടിനെ തിരിച്ചടിച്ചിരിക്കുകയാണ് ഇപ്പോൾ സുകുമാരൻ നായർ.

ശബരിമലയിലെ വിഷയത്തിൽ സംസ്ഥാന സർക്കാരും ഇടതു മുന്നണിയും വിശ്വാസ വിരുദ്ധമായ നിലപാട് ഇപ്പോഴും തുടരുകയാണ് എന്ന് എൻഎസ്എസ് ജനറൽ സെക്രട്ടറി ആവർത്തിച്ചു. എന്നാൽ, വിശ്വാസം സംരക്ഷിക്കുന്ന വിഷയത്തിൽ കേന്ദ്ര സർക്കാർ ആത്മാർത്ഥമായ യാതൊന്നും ചെയ്തില്ലെന്ന് പ്രഖ്യാപിച്ച അദ്ദേഹം ശബരിമല വിഷയത്തിൽ ആദ്യമായി ബിജെപിയ്‌ക്കെതിരെ ആഞ്ഞടിച്ചു.

രാഷ്ട്രീയസാഹചര്യങ്ങളും സാമുദായിക സമവാക്യങ്ങളും കണക്കിലെടുത്ത് അടിസ്ഥാനമൂല്യങ്ങൾ സംരക്ഷിക്കുന്നതിനായി ഉപതിരഞ്ഞെടുപ്പിൽ ശരിദൂരം സ്വീകരിക്കുമെന്നും ജി. സുകുമാരൻ നായർ പറഞ്ഞു. അത് എങ്ങനെയാകണമെന്ന് സമുദായാംഗങ്ങൾക്ക് നല്ലതുപോലെ അറിയാമെന്നും ചങ്ങനാശേരി താലൂക്ക് എൻ.എസ്.എസ് യൂണിയന്റെ വിജയദശമി നായർ മഹാസമ്മേളനം ഉദ്ഘാടനം ചെയ്യുന്നതിനിടെയാണ് സുകുമാരൻ നായർ ബിജെപി – സംഘപരിവാർ വിരുദ്ധ നിലപാട് വീണ്ടും ശക്തമായി അവർത്തിച്ചത്.

സംസ്ഥാന സർക്കാർ രാഷ്ട്രീയ നേട്ടത്തിനായി നവോത്ഥാനത്തിന്റെ പേരു പറഞ്ഞ് ജനങ്ങളിൽ സവർണ? – അവർണ ചേരിതിരിവുണ്ടാക്കുകയാണ്. കേരളത്തിൽ വർഗീയ കലാപത്തിന് വഴിതെളിക്കുകയാണ്. ശബരിമല യുവതീപ്രവേശത്തിൽ എൻ.എസ്.എസ് വിശ്വാസികളോടൊപ്പമാണ്. എന്നാൽ സംസ്ഥാനസർക്കാരും ഇടതുമുന്നണിയും വിശ്വാസികൾക്കെതിരായ നിലപാടാണ് സ്വീകരിക്കുന്നത്.

ശബരിമലയിൽ വിശ്വാസം സംരക്ഷിക്കുന്നതിന് കേന്ദ്രസർക്കാർ ആത്മാർത്ഥമായ യാതൊരു നടപടിയും സ്വീകരിച്ചിട്ടില്ല. സുപ്രീംകോടതി വിധിക്കെതിരെ ഓർഡിനൻസ് കൊണ്ടുവരാതെ അവർ വിശ്വാസ സമൂഹത്തെ തെറ്റിദ്ധരിപ്പിച്ചു. കേന്ദ്രസർക്കാർ എൻ.എസ്.എസിനെയും വിശ്വാസികളെയും പുതപ്പിച്ചു കിടത്തുകയായിരുന്നു. മന്നത്തു പത്മനാഭന്റെ ജന്മദിനമായ ജനുവരി രണ്ട് നെഗോഷ്യബിൾ ഇൻസ്ട്രുമെന്റ് ആക്ടിന്റെ പരിധിയിൽപെടുന്ന പൊതു അവധിയാക്കണമെന്നാവശ്യപ്പെട്ട് രണ്ട് തവണ സർക്കാരിന് നിവേദനം സമർപ്പിച്ചെങ്കിലും തള്ളിക്കളഞ്ഞെന്നും സുകുമാരൻ നായർ പറഞ്ഞു.

ശബരിമല വിഷയം വീണ്ടും ചർച്ചയ്‌ക്കെത്തിച്ച് സംസ്ഥാനത്ത് ഉപതിരഞ്ഞെടുപ്പ് നടക്കുന്ന അഞ്ചിൽ മൂന്നിടത്തെങ്കിലും വിജയിക്കാമെന്നായിരുന്നു ബിജെപിയുടെ പ്രതീക്ഷ. വ്ട്ടിയൂർക്കാവിലും, കോന്നിയിലും, മഞ്ചേശ്വരത്തുമായിരുന്നു ബിജെപി വിജയം പ്രതീക്ഷിച്ചിരുന്നത്. എന്നാൽ, സുകുമാരൻനായർ തിരിച്ചടിച്ചതോടെ ബിജെപിയുടെ വിജയന പ്രതീക്ഷയത്രയും അസ്ഥാനത്തായി.