സ്റ്റുഡന്‍റ് പൊലീസ് കേഡറ്റ്, സംസ്ഥാനതല സമ്മർ ക്യാമ്പ് ആരംഭിച്ചു
സ്വന്തംലേഖകൻ
കോട്ടയം : തിരുവനന്തപുരം എസ്.എ.പി ക്യാമ്പില്‍ സ്റ്റുഡന്‍റ് പൊലീസ് കേഡറ്റുകള്‍ക്കായുള്ള സംസ്ഥാനതല സമ്മര്‍ ക്യാമ്പ് ആരംഭിച്ചു. ഞായറാഴ്ച വൈകിട്ട് പേരൂര്‍ക്കട എസ്.എ.പി ക്യാമ്പില്‍ എ.ഡി.ജി.പി എസ്. ആനന്ദകൃഷ്ണന്‍ പതാക ഉയര്‍ത്തിയതോടെ ക്യാമ്പിന് തുടക്കമായി. ഗവര്‍ണര്‍ പി.സദാശിവം ക്യാമ്പ് ഉദ്ഘാടനം ചെയ്തു. ചടങ്ങിൽ സംസ്ഥാന പൊലീസ് മേധാവി ലോകനാഥ് ബെഹറ അധ്യക്ഷത വഹിച്ചു.
ഏപ്രില്‍ ഏഴ് വരെ നീളുന്ന ക്യാമ്പില്‍ വിവിധ ജില്ലകളില്‍ നിന്നായി 600 ഓളം കുട്ടികള്‍ പങ്കെടുക്കും. സാമൂഹിക സാംസ്കാരിക രംഗത്തെ പ്രമുഖര്‍, വിവിധ മേഖലകളിലെ ഉദ്യോഗസ്ഥര്‍, കലാകായിക ശാസ്ത്ര രംഗത്തെ പ്രമുഖര്‍ എന്നിവര്‍ കുട്ടികളുമായി സംവദിക്കും. എല്ലാ ദിവസവും കലാപരിപാടികളും വിവിധ സ്ഥാപനങ്ങളിലെ സന്ദര്‍ശനവും ഒരുക്കിയിട്ടുണ്ട്. കൂടാതെ മോഡല്‍ അസംബ്ലിയും ഉണ്ടായിരിക്കും.
ഏപ്രില്‍ ഒന്നിന് രാവിലെ പത്തുമണിക്ക് പ്രശസ്ത മോട്ടിവേഷണല്‍ സ്പീക്കര്‍ ഡോ.മധുജന്‍ ക്ലാസ് എടുക്കും. നിയമവും സമൂഹവും എന്ന വിഷയത്തില്‍ വൈകിട്ട് നടക്കുന്ന ചര്‍ച്ചയില്‍ മുന്‍ സംസ്ഥാന പൊലീസ് മേധാവി ജേക്കബ് പുന്നൂസ്, ഫയര്‍ ഫോഴ്സ് മേധാവിയും ഡി.ജി.പിയുമായ എ.ഹേമചന്ദ്രന്‍, ജില്ലാ ജഡ്ജി കെ ബാബു എന്നിവര്‍ പങ്കെടുക്കും.
ഏപ്രില്‍ രണ്ടിന് വൈകിട്ട് മാധ്യമങ്ങളെക്കുറിച്ചുളള ചര്‍ച്ചയില്‍ ഏഷ്യനെറ്റ് ന്യൂസ് എഡിറ്റര്‍ എം.ജി രാധാകൃഷ്ണന്‍, മനോരമ ന്യൂസ് ന്യൂസ് ഡയറക്ടര്‍ ജോണി ലൂക്കോസ്, മാത്യഭൂമി ന്യൂസ് സി.ഇ.ഒ മോഹനന്‍ നായര്‍, കൈരളി ടിവി ന്യൂസ് ഡയറക്ടര്‍ എന്‍.പി ചന്ദ്രശേഖരന്‍ എന്നിവര്‍ പങ്കെടുക്കും
ഏപ്രില്‍ മൂന്നിന് രാവിലെ 8.30 മുതല്‍ ജിമ്മി ജോര്‍ജ്ജ് ഇന്‍ഡോര്‍ സ്റ്റേഡിയത്തില്‍ സംസ്ഥാനതല ക്വിസ് മത്സരം നടക്കും. വൈകിട്ട് 6.45 ന് നടക്കുന്ന സാഹിത്യ സംവാദത്തില്‍ പ്രൊഫ. ജോര്‍ജ്ജ് ഓണക്കൂര്‍, എ.ഡി.ജി.പി ഡോ.ബി സന്ധ്യ, മുരുകന്‍ കാട്ടാക്കട എന്നിവര്‍ പങ്കെടുക്കും.
ഏപ്രില്‍ നാലിന് രാവിലെ പത്തുമണിക്ക് നടക്കുന്ന സെഷനില്‍ കൃഷ്ണനുണ്ണി, വി.കെ ശശികുമാര്‍ വേലത്ത് എന്നിവര്‍ പങ്കെടുക്കും. വൈകിട്ട് 6.45 ന് നടക്കുന്ന സംവാദത്തില്‍ പ്രശസ്ത മജീഷ്യന്‍ ഗോപിനാഥ് മുതുകാട് പങ്കെടുക്കും.
ഏപ്രില്‍ അഞ്ചിന് രാവിലെ പത്തുമണിക്ക് ഗോപിനാഥ് പാറയില്‍ പങ്കെടുക്കുന്ന ഇന്‍ഡോര്‍ സെഷന്‍ തുടരും.വൈകുന്നേരം 6.45 ന് ആരോഗ്യരംഗവുമായി ബന്ധപ്പെട്ട ചര്‍ച്ചയില്‍ പ്രശസ്ത പോഷകാഹാര ശാസ്ത്രജഞന്‍ ഡോ.എം അനിരുദ്ധന്‍, സൈക്യാട്രി അസോസിയേറ്റ് പ്രൊഫസര്‍ ഡോ.അരുണ്‍ ബി നായര്‍ എന്നിവര്‍ പങ്കെടുക്കും.
ഏപ്രില്‍ ആറിന് രാവിലെ പത്തിന് ഇന്‍ഡോര്‍ സെഷനില്‍ ഐ.ജി പി വിജയന്‍, ഗോപിനാഥ് പാറയില്‍ എന്നിവര്‍ പങ്കെടുക്കുന്ന ചര്‍ച്ച. വൈകിട്ട് 6.45 ന് പ്രപഞ്ച സംരക്ഷണത്തെക്കുറിച്ചുള്ള സംവാദത്തില്‍ വനം വകുപ്പ് പ്രിന്‍സിപ്പല്‍ ചീഫ് കണ്‍സര്‍വേറ്റര്‍ പി.കെ കേശവന്‍, ഐ.എം.ജി ഡയറക്ടറും മുന്‍ ചീഫ് സെക്രട്ടറിയുമായ കെ.ജയകുമാര്‍ എന്നിവര്‍ പങ്കെടുക്കും.
സമാപന ദിവസമായ ഏപ്രില്‍ ഏഴിന് രാവിലെ 10.30 ന് ഇന്‍ഡോര്‍ സെഷനില്‍ സ്റ്റുഡന്‍റ് പോലീസ് കേഡറ്റ് പദ്ധതിയുടെ ഭാവി പരിപാടികള്‍ ചര്‍ച്ച ചെയ്യും. വൈകിട്ട് ആറുമണിക്ക് രാഷ്ട സുരക്ഷയെക്കുറിച്ചു നടക്കുന്ന സംവാദത്തില്‍ കരസേന, വായുസേന, നാവികസേന, പോലീസ് എന്നിവയിലെ ഉയര്‍ന്ന ഉദ്യോഗസ്ഥര്‍ പങ്കെടുക്കും. രാത്രി ഏഴുമണിക്ക് സമാപനചടങ്ങും സമ്മാനദാനവും നടക്കും.
