ഭാര്യയുടെ മൃതദേഹം വീട്ടിൽ സൂക്ഷിച്ച ഭർത്താവ് വളർത്തുനായയെ കൊലപ്പെടുത്തിയ ശേഷം ജീവനൊടുക്കി; ”തനിക്കാരുമില്ലെന്ന് ആത്മഹത്യക്കുറിപ്പിൽ”

സ്വന്തം ലേഖകൻ

പെരിന്തൽമണ്ണ : ഭാര്യയുടെ മൃതദേഹം രണ്ടു ദിവസം വീട്ടിൽ സൂക്ഷിച്ച ഭർത്താവ് വളർത്തുനായയെ കൊലപ്പെടുത്തിയ ശേഷം ജീവനൊടുക്കി. കുന്നപ്പള്ളി വായനശാലാ പരിസരത്തെ പടിക്കൽപുരയ്ക്കൽ ശ്രീധര(65)നെയാണ് വീട്ടിൽ തൂങ്ങിമരിച്ച നിലയിൽ കണ്ടെത്തിയത്.

ഭാര്യ സരോജിനി(മണി-68)യുടെ മൃതദേഹം തൊട്ടടുത്ത മുറിയിലെ കട്ടിലിൽ കണ്ടെത്തി. സരോജിനിയുടേത് സ്വാഭാവിക മരണമാണെന്നാണ് പോസ്റ്റ്മോർട്ടത്തിലെ പ്രാഥമിക നിഗമനം. മൺവെട്ടികൊണ്ട് തലയ്ക്കടിച്ചു കൊലപ്പെടുത്തിയ നിലയിൽ വീടിനു പിന്നിലാണ് വളർത്തു നായയെ കണ്ടെത്തിയത്. ശ്രീധരന്റെ പോക്കറ്റിൽനിന്ന് ആത്മഹത്യക്കുറിപ്പ് കണ്ടെടുത്തതായി പൊലീസ് പറഞ്ഞു.

ഭാര്യ നെഞ്ചുവേദന വന്നു മരിച്ചെന്നും ഇനി തനിക്ക് ആരും ഇല്ലാത്തതിനാൽ വളർത്തുനായയെ കൊന്നശേഷം ആത്മഹത്യ ചെയ്യുന്നതായുമാണ് കത്തിൽ പറയുന്നത്. 15 വർഷമായി ശ്രീധരനും സരോജിനിയും കുന്നപ്പള്ളിയിൽ താമസമാക്കിയിട്ട്. വീട്ടിലുണ്ടായിരുന്ന തിരിച്ചറിയൽ രേഖകളും ആധാരവും മറ്റും കത്തിച്ച നിലയിലാണ്.