അവധിക്ക് നാട്ടിലെത്തിയ സൈനികൻ ക്ഷേത്രദര്‍ശനം കഴിഞ്ഞ് വരികയായിരുന്ന സ്ത്രീയുടെ മാല പൊട്ടിച്ചോടി ; മോഷണം കടം വീട്ടാനെന്ന് മൊഴി

കണ്ണൂര്‍: തലശേരിയില്‍ വയോധികയുടെ മാല കവർന്ന കേസില്‍ സൈനികൻ അറസ്റ്റില്‍. കതിരൂർ സ്വദേശി ശരത്താണ് പിടിയിലായത്.

ബുധനാഴ്ച രാവിലെ ക്ഷേത്രദർശനം കഴിഞ്ഞ് വരികയായിരുന്ന ജാനകിയുടെ മാലയാണ് ഇയാള്‍ പൊട്ടിച്ചോടിയത്. ഷെയർ ട്രേഡിംഗില്‍ ശരത്തിന് വൻ തുക നഷ്ടപ്പെട്ടിരുന്നു. ഇതിനായി മേടിച്ച കടം വീട്ടാനായാണ് മോഷ്ടിച്ചത് എന്നാണ് മൊഴി.

ബിഹാറില്‍ സൈനികനായ ജോലിചെയ്യുന്ന ഇയാള്‍ അവധിക്ക് നാട്ടിലെത്തിയതാണ്. ജാനകിയുടെ മാല കവർന്നതിനു പുറമേ പള്ളൂരിലെ ഒരു സ്ത്രീയുടെ മാലയും ശരത് മോഷ്ടിച്ചിരുന്നു.

അത് മുക്കുപണ്ടം ആയതിനാല്‍ സ്ത്രീ പരാതിപ്പെട്ടിരുന്നില്ല. പ്രതിയെ റിമാൻഡ് ചെയ്തു.