സ്വന്തം ലേഖിക
ന്യൂഡൽഹി: മുഖ്യമന്ത്രിയുടെ മുൻ പ്രിൻസിപ്പല് സെക്രട്ടറിയും ലൈഫ് മിഷൻ കേസിലെ പ്രതിയുമായ എം ശിവശങ്കറിന് അനുവദിച്ച ജാമ്യം രണ്ട് മാസത്തേക്ക് കൂടി നീട്ടി.
നട്ടെല്ലിന്റെ രണ്ടാമത്തെ ശസ്ത്രക്രിയക്ക് കൂടുതല് സമയം അനുവദിക്കണമെന്ന ശിവശങ്കറിന്റെ ആവശ്യം സുപ്രീം കോടതി പരിഗണിച്ചതിനെ തുടർന്നാണ് ജാമ്യം നീട്ടിയത്. നട്ടെല്ലിന്റെ ശസ്ത്രക്രിയക്കും ചികിത്സയ്ക്കുമായി ശിവശങ്കറിന് രണ്ട് മാസത്തെ ജാമ്യമാണ് നേരത്തെ അനുവദിച്ചിരുന്നത്.
Whatsapp Group 1 | Whatsapp Group 2 |Telegram Group
ഇത് ഒക്ടോബര് 2-ന് അവസാനിക്കാനിരിക്കെയാണ് ജാമ്യ കാലാവധി നീട്ടണമെന്നാവശ്യപ്പെട്ട് ശിവശങ്കര് വീണ്ടും സുപ്രീം കോടതിയെ സമീപിച്ചത്. ഒരു ശസ്ത്രക്രിയ ഇതിനോടകം പൂര്ത്തിയായെന്നും ഒരു ശസ്ത്രക്രിയകൂടി ഉണ്ടെന്നും ശിവശങ്കറിനുവേണ്ടി ഹാജരായ സീനിയര് അഭിഭാഷകൻ ജയന്ത് മുത്തുരാജും അഭിഭാഷകൻ മനു ശ്രീനാഥും അറിയിച്ചു.
ചികിത്സയ്ക്കായി അനന്തമായി ജാമ്യം നീട്ടിനല്കുന്നതിനെ ഇ.ഡിക്കുവേണ്ടി ഹാജരായ അഡീഷണല് സോളിസിസ്റ്റര് ജനറല് കെ.എം. നടരാജ് എതിര്ത്തു. ഈ എതിര്പ്പ് അവഗണിച്ചാണ് സുപ്രീം കോടതി ജാമ്യ കാലാവധി രണ്ട് മാസത്തേക്കുകൂടി നീട്ടിയത്. കാലാവധി കഴിയുമ്പോള് ശിവശങ്കര് കീഴടങ്ങണമെന്നും കോടതി പറഞ്ഞു.
