സ്വന്തം ലേഖിക
പത്തനംതിട്ട: പത്തനംതിട്ട ജില്ലയില്‍ മഴ തുടരും.
തെക്ക്-കിഴക്കന്‍ അറബികടലിലും വടക്കന്‍ തമിഴ്‌നാട്ടിലും സ്ഥിതി ചെയ്യുന്ന ചക്രവാത ചുഴിയുടെ സ്വാധീനത്താല്‍ വളരെ കനത്ത, തീവ്ര മഴയ്ക്കും സാധ്യത. കനത്ത മഴയുടെ പശ്ചാത്തലത്തില്‍ ജില്ലാ കളക്ടര്‍ ഡോ. ദിവ്യ എസ് അയ്യര്‍ ഉദ്യോഗസ്ഥര്‍ക്ക് അതീവ ജാഗ്രതാ നിര്‍ദ്ദേശം നല്‍കി.
Whatsapp Group 1 | Whatsapp Group 2 |Telegram Group
മൂഴിയാര്‍, കക്കി ഡാമുകളില്‍ റെഡ് അലര്‍ട്ട് പ്രഖ്യാപിച്ചു. ഇവിടെ ജലനിരപ്പ് സംഭരണ ശേഷിയോട് അടുക്കുകയാണ്. നദീ തീരങ്ങളില്‍ അതീവ ജാഗ്രത പാലിക്കുക. നദി തീരങ്ങളില്‍ ഇറങ്ങരുത്.
ഉരുള്‍ പൊട്ടല്‍, മണ്ണിടിച്ചില്‍ സാധ്യത പ്രദേശങ്ങളില്‍ നിന്ന് എല്ലാവരും ദുരിതാശ്വാസ ക്യാമ്ബുകളിലേക്ക് മാറി താമസിക്കുക. വെള്ളപ്പൊക്ക മേഖലകളില്‍ ജനങ്ങള്‍ ആവശ്യം വന്നാല്‍ മാറി താമസിക്കാന്‍ സജ്ജരാകണം. മലയോര മേഖലയിലെ യാത്ര ഒഴിവാക്കണം.
തെക്കന്‍ കേരളത്തില്‍ വലിയ മഴയാണ് പെയ്യുന്നത്. തിരുവനന്തപുരത്തും തോരാ മഴയാണ്. ഇവിടേയും ഡാമുകള്‍ നിറഞ്ഞു കവിഞ്ഞിട്ടുണ്ട്. എന്നാല്‍ പത്തനംതിട്ടയിലാണ് കൂടുതല്‍ ആശങ്ക.
നാഥനടിക്കളം ഭാഗത്ത് ആറ് വീടുകളില്‍ വെള്ളം കയറിയതിനെത്തുടര്‍ന്ന് മുടിയൂര്‍കോണം എംറ്റിഎല്‍പിഎസില്‍ ക്യാമ്ബ് ആരംഭിച്ചു. അരുവാപ്പുലം വില്ലേജിലെ തട്ടാശ്ശേരില്‍ വിജയന്‍, സുവര്‍ണ്ണ എന്നിവരുടെ വീട്ടില്‍ പുനലൂര്‍ മൂവാറ്റുപുഴ റോഡിന്ന് പാരലായി ഒഴുകുന്ന തോട്ടില്‍ നിന്നും വെള്ളം കയറി.
വീട്ടുകാര്‍ സുരക്ഷിതമായി മാറിയിട്ടുണ്ട്. മറ്റുള്ളവര്‍ക്ക് ജാഗ്രതാ നിര്‍ദ്ദേശം നല്‍കി. കലഞ്ഞൂര്‍ പാടം മേഖലയില്‍ ഉണ്ടായ അതിശക്തമായ കാറ്റില്‍ സീമാ ഭവനം വീട്ടില്‍ ശിവദാസന്‍ എന്നയാളും കുടുംബവും താമസിച്ചു വരുന്ന വീടിന്റെ മേല്‍ക്കൂരയിലെ ആസ്ബറ്റോസ് ഷീറ്റുകള്‍ തകര്‍ന്നു.
അടൂര്‍ താലൂക്കില്‍ ഏനാദിമംഗലം വില്ലേജില്‍ മങ്ങാട് മുറിയില്‍ തടത്തില്‍ പടീഞ്ഞാറ്റതില്‍ സരള മോഹന്റെ വീടിന് മുകളിലേക്ക് പ്ലാവ് പിഴുതു വീണ് വീടിന് ഭാഗികമായി നാശനഷ്ടം സംഭവിച്ചു. തുമ്ബമണ്‍ മാമ്ബിലാലി തുണ്ടിയില്‍ഇടപ്പുരയില്‍ വീട്ടില്‍ കമലാസനന്റെ വീടിന് മുകളിലേക്ക് കനത്ത കാറ്റിലും മഴയിലും പെട്ട് ആഞ്ഞിലിമരം ഒടിഞ്ഞ് വീണ് വീടിന് ഭാഗികമായ നാശനഷ്ടം സംഭവിച്ചു. പള്ളിക്കല്‍ വില്ലേജില്‍ ഇളംപള്ളില്‍ ശാന്തമ്മയുടെ വീടിന്റെ മേല്‍ക്കൂര ശക്തമായ മഴയില്‍ ഭാഗികമായി തകര്‍ന്നു.
പത്തനംതിട്ട-കൈപ്പട്ടൂര്‍ റോഡിലെ പാലത്തിന്റെ അപ്രോച്ച്‌ റോഡിന്റെ സംരക്ഷണ ഭിത്തി കനത്ത മഴയില്‍ ഇടിഞ്ഞു. കരിങ്കല്‍ കെട്ട് താഴെയുള്ള വീടിന് മുന്നിലേക്ക് പതിച്ചിരിക്കുകയാണ്. റോഡില്‍ നിന്ന് ആഴത്തിലുള്ള കുഴിയും രൂപപ്പെട്ടു. റോഡില്‍ ഗതാഗത നിയന്ത്രണം ഏര്‍പ്പെടുത്തിയിട്ടുണ്ട്.
ഏതാനും വര്‍ഷങ്ങള്‍ക്ക് മുന്‍പും ഈ കരയിലെ അപ്രോച്ച്‌ റോഡ് ഇടിഞ്ഞു താണിരുന്നു. അന്ന് പൂര്‍ണമായും ഗതാഗതം തടസപ്പെട്ടു. പിന്നീട് യുദ്ധകാലാടിസ്ഥാനത്തില്‍ പണിത ഭിത്തിയാണ് വീണ്ടും തകര്‍ന്നിരിക്കുന്നത്. നവംബര്‍ ആദ്യമുണ്ടായ മഴയില്‍ ഈ ഭാഗത്ത് റോഡിന് വിള്ളലുണ്ടായിരുന്നു. ഇതേ തുടര്‍ന്ന് ഈ ഭാഗത്ത് കോണ്‍ സ്ഥാപിച്ച്‌ ഗതാഗത നിയന്ത്രണം ഏര്‍പ്പെടുത്തിയിരുന്നു.
കുറച്ചു ദിവസങ്ങള്‍ക്ക് ശേഷം കോണും വലിച്ചു കെട്ടിയ റിബണും നീക്കി വാഹനങ്ങള്‍ പതിവു പോലെ യാത്ര തുടരുകയായിരുന്നു. ആ ഭാഗമാണ് ഇപ്പോള്‍ ഇടിഞ്ഞു താഴ്ന്നിരിക്കുന്നത്.
വിവിധ ജില്ലകളിലെ മഴ മുന്നറിയിപ്പുകള്‍
14-11-2021: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, കാസറഗോഡ്
15-11-2021: കോഴിക്കോട്, വയനാട്, കണ്ണൂര്‍, കാസറഗോഡ് എന്നീ ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു.
14-11-2021: എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍
15-11-2021: ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം
16-11-2021: പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസറഗോഡ് എന്നീ ജില്ലകളില്‍ മഞ്ഞ അലര്‍ട്ട് പ്രഖ്യാപിച്ചു.
അടുത്ത 24 മണിക്കൂറിനുള്ളില്‍ ന്യൂനമര്‍ദം ശക്തിപ്രാപിച്ച്‌ അതിതീവ്ര ന്യൂനമര്‍ദമാകുമെന്നാണ് കാലാവസ്ഥാ കേന്ദ്രം നല്‍കുന്ന മുന്നറിയിപ്പ്. അറബിക്കടലില്‍ ചക്രവാതച്ചുഴി രൂപപ്പെട്ടതിന്റെ ഭാഗമായുള്ള മഴയും ലഭിക്കുന്നുണ്ട്. ന്യൂനമര്‍ദത്തെ കാലാവസ്ഥാ കേന്ദ്രം നിരീക്ഷിച്ച്‌ വരികയാണ്. തെക്ക് കിഴക്കന്‍ അറബിക്കടലിലും വടക്കന്‍ തമിഴ് നാടിനു മുകളിലും ചക്രവാതചുഴി നിലനില്‍ക്കുന്നു. ഇതിനാല്‍ പടിഞ്ഞാറന്‍ കാറ്റ് ശക്തി പ്രാപിച്ചിരിക്കുന്നു.
ഇതിന്റെ സ്വാധീനത്താല്‍ കേരളത്തില്‍ അടുത്ത രണ്ടു ദിവസം ഒറ്റപ്പെട്ട ശക്തമായ/അതിശക്തമായ മഴയ്ക്ക് സാധ്യതയുണ്ട്. തെക്കന്‍ കേരളത്തില്‍ അതിശക്ത മഴ ഉണ്ടായേക്കാമെന്നാണ് കേന്ദ്ര കാലാവസ്ഥാ നിരീക്ഷണകേന്ദ്രം അറിയിച്ചിരിക്കുന്നത്.
