എസ്‌ഐക്കെതിരെ വനിത സിപിഒ; മാനസികമായി പീഡിപ്പിച്ചു,ചോദ്യം ചെയ്തപ്പോള്‍ അപമാനിച്ച്‌ ഇറക്കിവിട്ടു;എറണാകുളം പനങ്ങാട് സ്റ്റേഷനിലാണ് നാടകീയ സംഭവം

സ്വന്തം ലേഖകൻ

കൊച്ചി: ഡ്യൂട്ടിയുടെ പേരിലുള്ള മാനസിക പീഡനം ചോദ്യം ചെയ്ത വനിത പൊലീസുകാരിയെ എസ്‌ഐ അപമാനിച്ച്‌ ഇറക്കിവിട്ടെന്ന് പരാതി.ഇന്ന് (14/01/2022)രാവിലെ എറണാകുളം പനങ്ങാട് സ്റ്റേഷനിലാണ് നാടകീയ സംഭവം ഉണ്ടായത്.

രാവിലെ സ്റ്റേഷന്‍ ഡ്യൂട്ടിയെക്കുറിച്ച്‌ സംസാരിക്കുന്നതിനിടെ അധിക്ഷേപവാക്കുകള്‍ പറഞ്ഞ് ഇറക്കിവിട്ടെന്നാണ് ആരോപണം.
സംഭവത്തിന് പിന്നാലെ വിശ്രമ മുറിയില്‍ കയറി വാതിലടച്ച ഉദ്യോഗസ്ഥയെ സഹപ്രവര്‍ത്തകര്‍ വാതില്‍ ചവിട്ടി പൊളിച്ച്‌ പുറത്തിറക്കി.

എസ്‌ഐ ജിന്‍സന്‍ ഡൊമനിക്കിന്‍റെ നടപടിയിലാണ് വനിത സിപിഒ പ്രതിഷേധം ഉയര്‍ത്തിയത്.

ഡ്യൂട്ടിയെ ചൊല്ലി സ്റ്റേഷനില്‍ എസ്‌ഐയും ഉദ്യോഗസ്ഥരും തമ്മില്‍ ഭിന്നതയുണ്ടെന്നാണ് ഉദ്യോഗസ്ഥര്‍ വിശദീകരിക്കുന്നത്.സംഭവത്തില്‍ ഡിസിപി അന്വേഷണത്തിന് നിര്‍ദ്ദേശം നല്‍കി.