ഇതാവണമെടാ പൊലീസ്: ഇങ്ങനെ ആകണം പൊലീസ്: വഴിയിൽ നഷ്ടമായ 30,000 രൂപ അടങ്ങിയ ബാഗ് സിസിടിവി ക്യാമറയിലൂടെ കണ്ടെത്തി നൽകി പൊലീസുകാർ മാതൃകയായി

സ്വന്തം ലേഖകൻ

കോട്ടയം : പൊലീസുകാർ എങ്ങിനെ ആകണം എന്നത് തിരിച്ചറിയണമെങ്കിൽ കോട്ടയം തിരുനക്കര ക്ഷേത്ര മുറ്റത്തെ സ്പൈഡർ പെട്രോളിംങ്ങ് പൊലീസ് സംഘത്തെക്കുറിച്ച് അറിയണം. ക്ഷേത്ര ദർശനത്തിന് എത്തിയ തിരുനക്കര സ്വദേശിയുടെ , 30000 രൂപ അടങ്ങിയ ബാഗ് നഷ്ടമായത് സി.സി.ടി.വി ക്യാമറ പരിശോധിച്ച് മണിക്കൂറുകൾക്കുള്ളിൽ തിരികെ നൽകിയാണ് ഈ പൊലീസുകാർ മാതൃക സൃഷ്ടിച്ചത്. തിരുനക്കര യൂണിയൻ ക്ലബിന് സമീപം , പുണ്യതീർത്ഥത്തിൽ ഗോപിനാഥൻ നായരാണ് (78) കേരള പൊലീസിന്റെ കാരുണ്യം അനുഭവിച്ചത്.

വെള്ളിയാഴ്ച രാവിലെയായിരുന്നു സംഭവം നടന്നത്. തിരുനക്കര ക്ഷേത്രത്തിൽ ദർശനത്തിനായാണ് ഗോപിനാഥൻ നായർ രാവിലെ എത്തിയത്.

ക്ഷേത്രത്തിൽ ദർശനം നടത്തിയ ശേഷം പുറത്തിറങ്ങിയപ്പോഴാണ് ബാഗ് നഷ്ടമായ വിവരം ഇദ്ദേഹം അറിഞ്ഞത്. തുടർന്ന് ഇദ്ദേഹം വിവരം ഈ സമയം തിരുനക്കര ക്ഷേത്രത്തിൽ ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥരെ വിവരം അറിയിച്ചു.

ഈ സമയം തിരുനക്കര ക്ഷേത്ര മൈതാനത്ത് ഡ്യൂട്ടിയിലുണ്ടായിരുന്ന സ്പൈഡർ പെട്രോളിംങ്ങ് സംഘാംഗങ്ങളായ സിവിൽ പൊലീസ് ഓഫിസർമാരായ സുരേഷ് , റെജിമോൻ, സിദിഖ് , മധു എന്നിവർ പരിശോധനയ്ക്കായി ഇറങ്ങുകയായിരുന്നു.

തുടർന്ന് ഭാരത് ആശുപത്രി ഭാഗത്ത് എത്തിയ പൊലീസ് സംഘം പ്രദേശത്തെ സിസിടിവി ക്യാമറകൾ പരിശോധിച്ചു. ഇതിൽ നിന്ന് റോഡരികിൽ ബാഗ് കിടക്കുന്നത് കണ്ടെത്തി. തുടർന്ന് ഈ ബാഗ് തിരികെ ഗോപിനാഥർ നായരെ തിരികെ ഏൽപ്പിച്ചു.