പെരുന്ന ബസ് സ്റ്റാന്‍ഡില്‍ അരങ്ങേറിയത് ഉള്ള് പൊള്ളുന്ന ക്രൂരത; ബസ് ജീവനക്കാരന്‍ മനോദൗര്‍ബല്യമുള്ള ആളുടെ ദേഹത്ത് ചൂട് വെള്ളം ഒഴിച്ചു; മനോദൗര്‍ബല്യമുള്ളയാള്‍ ഒരു കാലത്തെ ബസ് മുതലാളി

സ്വന്തം ലേഖകന്‍

ചങ്ങനാശേരി: ബസ് ജീവനക്കാരന്‍ മാനസിക രോഗിയുടെ ദേഹത്ത് ചൂട് വെള്ളം ഒഴിച്ചു. കണ്ണില്ലാത്ത ക്രൂരത അരങ്ങേറിയത് പെരുന്ന രണ്ടാം നമ്പര്‍ ബസ് സ്റ്റാന്‍ഡിലായിരുന്നു. മാനസിക സ്ഥിരത നഷ്ടപ്പെട്ട തൃക്കൊടിത്താനം സ്വദേശിയായ സ്റ്റാന്‍ലിയുടെ ദേഹത്താണ് ബസ് ജീവനക്കാരന്‍ ചൂട് വെള്ളമൊഴിച്ചത്. ചങ്ങനാശേരി കവിയൂര്‍ റൂട്ടില്‍ ഓടുന്ന ബസിലെ ജീവനക്കാരനാണ് സ്റ്റാന്‍ലിയുടെ ദേഹത്ത് ചൂട് വെള്ളം ഒഴിച്ച് പൊള്ളിച്ചത്.

ചങ്ങനാശ്ശേരിയിലെ ബസ് സ്റ്റാന്‍ഡുകളില്‍ സ്ഥിരം സാന്നിധ്യമാണ് സ്റ്റാന്‍ലി. രോഗത്തിന്റെ ഭാഗമായി ആരെയും ഉപദ്രവിച്ചതായോ മറ്റ് ബുദ്ധിമുട്ടുകള്‍ സൃഷ്ടിച്ചതായോ ഇത് വരെ അറിവില്ല എന്നാണ് സ്റ്റാന്‍ഡിലുള്ളവര്‍ പറയുന്നത്. ഒരു കാലത്ത് സ്വന്തമായി ബസ് വരെ ഉണ്ടായിരുന്ന ഇയാള്‍ റൂട്ടിലോടുന്ന ബസില്‍ കയറി പോവുക പതിവായിരുന്നു. സംഭവത്തെ തുടര്‍ന്ന് ചങ്ങനാശേരി പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.