പത്തനംതിട്ടയിൽ സ്കൂട്ടര്‍ കലുങ്കിന്റെ മതിലില്‍ ഇടിച്ചുമറിഞ്ഞു; പരിക്കേറ്റ് മണിക്കൂറുകള്‍ കലുങ്കിനടിയില്‍ കിടന്ന യുവതി മരിച്ചു

കോഴഞ്ചേരി: കലുങ്കിന്റെ മതിലില്‍ സ്കൂട്ടർ ഇടിച്ചുമറിഞ്ഞ് യുവതിക്ക് ദാരുണാന്ത്യം.

മല്ലപ്പള്ളി മഞ്ഞത്താനം അരുണ്‍സ് കോട്ടേജില്‍ സിജി എം.ബിജി (25) ആണ് മരിച്ചത്.
അപകടത്തില്‍പ്പെട്ട യുവതി രാത്രി മണിക്കൂറുകളോളമാണ് പരിക്കേറ്റ് കലുങ്കിനടിയില്‍ കിടന്നത്.

ഞായറാഴ്ച രാത്രിയാണ് അപകടമുണ്ടായത്.
മുട്ടുമണ്‍-ചെറുകോല്‍പുഴ റോഡില്‍ പമ്ബ ജലസേചന പദ്ധതിയുടെ നീർപ്പാലത്തിനു സമീപമാണ് അപകടം. ഇവിടെ വാടകയ്ക്കു താമസിക്കുകയാണ് സിജി.

ഭർത്താവ് അബ്ദീഷ് ഇടുക്കിയിലുള്ള ജോലിസ്ഥലത്ത് ആയിരുന്നുവെന്ന് പൊലീസ് പറഞ്ഞു. അരകിലോമീറ്റർ അകലെ ഭർത്താവിന്റെ മാതാപിതാക്കള്‍ വാടകയ്ക്ക് താമസിക്കുന്ന വീട്ടില്‍നിന്ന് രാത്രി 9 മണിയോടെ ഭക്ഷണം കഴിച്ചിട്ടു പോയതാണെന്ന് വീട്ടുകാർ പറഞ്ഞു.

കോയിപ്രം പൊലീസ് കേസെടുത്തു. പാട്ടക്കാല അക്ഷയ സെന്ററിലെ ജീവനക്കാരിയായിരുന്നു. സംസ്കാരം പിന്നീട്.